Jyl basynan beri halyqtyń mazasyn alǵan 1500 elorda turǵyny jaýapqa tartylǵan
ASTANA. QazAqparat - Jańa Ákimshilik kodekske saı, qoǵamdyq oryndarda azamattarǵa jónsiz tıisip, mazasyn qashyrǵan adamdar ákimshilik jaýapkershilikke tartylady.
2015 jyldyń 1 qańtarynan bastap, jańa redaktsııadaǵy kodeks kúshine engennen beri Astana qalasynda osyndaı 1500 fakt tirkelgen. Bul týraly búgin Astana qalasynyń prokýratýrasynda ótken jıyn barysynda Astana qalasy ІІD Ákimshilik polıtsııa basqarmasy basshysynyń orynbasary Ǵosman Jakın málim etti.
«2015 jyldyń jarty jylynda elorda aýmaǵynda usaq buzaqylyqqa jol bergen 2260 azamat jaýapqa tartyldy. Bul tártip buzýshylyqtardyń arasynda ákimshilik sot 500 adamdy ákimshilik qamaýǵa aldy. Shamamen 10 myńnan astam azamat qoǵamdyq oryndarda ishimdik ishkeni úshin jáne qoǵamdyq oryndarǵa mas kúıinde kirgeni úshin, 9 myńnan asa azamat tyıym salynǵan oryndarda temeki tartqany úshin, 2 myńnan astam azamat ruqsat etilmegen oryndarda saýda jasaǵany úshin ákimshilik jaýapkershilikke tartylǵan»,-deıdi Ǵ.Jokın.
Al, 2015 jyldyń 1 qańtarynan bastap kúshine engen jańa ákimshilik kodekstegi ereje boıynsha jyl basynan beri «halyqtyń mazasyn alǵan» 1500 adam ákimshilik jaýapkershilikke tartylǵan eken.
«Qoǵamdyq oryndarda azamattardyń mazasyn alǵan 1500 fakt tirkeldi. Ózderińiz bilesizder, 2015 jyldyń 1 qańtarynan bastap jańa Ákimshilik kodeks kúshine endi. Kodekstiń jańa redaktsııasyndaǵy bul ózgeris qoǵamdyq oryndarda, sondaı-aq kóshede qarapaıym halyqtyń mazasyn alatyn jaıttardy anyqtap, tıisti sharalardy qolǵa alýǵa kóp paıdasyn tıgizip otyr»,-deıdi Ǵ.Jokın.
