Jyl basynan beri eńbek ınspektorlary 5 myńnan astam jumysshynyń quqyǵyn qorǵady
ASTANA. QazAqparat - 2017 jylǵy 1 sáýirdegi jaǵdaı boıynsha memlekettik eńbek ınspektorlary respýblıkanyń 437 kásipornynda 7,7 myń jumysker aldynda jalaqy boıynsha 943 mln teńgeden astam qaryz bar ekenin anyqtady, dep habarlady enbek.gov.kz.
Atalǵan kásiporyndardyń basshylaryna oryndalýy mindetti 388 uıǵarym berilip, 49 mln teńgeden astam somaǵa aıyppul salyndy.
Qoldanylǵan sharalardyń nátıjesinde, sonymen qatar, jalaqy boıynsha qaryzdy óteýdiń merzimi men kestesin qatań belgileý arqyly 5 myńnan astam jumyskerdiń quqyǵy qorǵalyp, nátıjesinde olarǵa 654 mln teńge tólendi.
Jalaqy tólemderi boıynsha qalǵan qaryzǵa qatysty jumys jalǵasyn tabady.
Jalpy, aǵymdaǵy jyldyń ótken kezeńinde memlekettik eńbek ınspektorlary 1549 tekserý júrgizip, 1,8 myńnan astam QR eńbek zańnamasyn buzý deregi anyqtalǵan jáne 65,6 mln teńge somaǵa aıyppul salyndy.
