Jyl basynan beri elordaǵa 200 myńǵa jýyq týrıst kelgen
NUR-SULTAN. QazAqparat - Ústimizdegi jyldyń І toqsanynda Nur-Sultan qalasyna 186 myń týrıst kelgen. Bul týraly qalalyq máslıhattyń otyrysynda belgili boldy, dep habarlaıdy QazAqparat tilshisi.
«2019 jyldyń І toqsanynda elordaǵa 186 myń týrıst keldi. Onyń 30 paıyzy sheteldik týrıst. Ótken jyly jylǵy kórsetkish 790 myń adamdy qurady. Sonymen qatar, N. Nazarbaev halyqaralyq áýejaıyndaǵy jolaýshylar aǵymy 5,8 paıyzǵa artyp nemese 4,5 mln adamǵa kóbeıdi. Halyqaralyq áýe reısterinde qyzmet kórsetilgen sheteldik meımandardyń sany 1,8 mln adamǵa jetti», - dedi Nur-Sultan qalasy Investıtsııalar jáne kásipkerlikti damytý basqarmasynyń basshysy Erlan Bekmyrzaev qalalyq máslıhattyń otyrysynda jasaǵan óz baıandamasynda.
Onyń aıtýyna qaraǵanda, bıyl elimizdiń bas qalasy TMD elderi ishinde saıahat jasaý úshin jıi tańdalatyn úzdik 5 qalanyń qataryna endi.
«2020 jyly elordaǵa jylyna 1 mln týrısti tartý maqsaty qoıylyp otyr. Ózderińiz biletindeı qazirgi ýaqytta qalanyń 2050 jylǵa deıingi damý strategııasy ázirlenip jatyr. Onyń ishinde týrızm salasy jeke baǵyt bolyp qarastyrylǵan. Sol sııaqty rebrendıng, ıaǵnı qala ataýynyń ózgerýi de óz áserin tıgizedi degen oıdamyz. Jáne elordaǵa keletin týrısterdi 1-2 kúnnen 3-4 nemese odan da kóp kúnge qalýy jolyndaǵy naqty sharalar qolǵa alynady. Búgingi kúni Nur-Sultanǵa keletin týrıst qalada ortasha eseppen 1,5 kúnge toqtalady», - deıdi ol.
Onyń málimdeýinshe, týrızm salasynyń sarapshylary elordada iskerlik, medıtsınalyq jáne qalalyq týrızmdi damytý kerek degen bastamany alǵa tartýda.
«Іskerlik týrızmdi damytý álemniń kóptegen elderinde basym baǵyttardyń biri bolyp tabylady. Atalǵan týrızm salasyn damytýǵa qandaı da bir tabıǵı resýrstar nemese teńizge shyǵýdy talap etpeıdi. Mysaly, EKSPO aýmaǵyndaǵy ǵımarattar men Kongress-Holl ortalyǵy bas qalamyzda halyqaralyq deńgeıdegi iskerlik sharalardy joǵary deńgeıde ótkizýge múmkindik beredi», - dedi E. Bekmyrzaev.
Basqarma basshysynyń sózine sensek, ótken jyly Nur-Sultan qalasynda túrli baǵyttaǵy 700-ge jýyq is-shara ótkizildi. Jáne jyl sanap elordada ótetin is-sharalardyń sany 10 paıyzǵa kóbeıip otyr.
«Al ústimizdegi jyl bastalǵaly 5 aıdyń ishinde elordada ártúrli masshtabtaǵy 300-ge jýyq is-shara ótti jáne 2025 jylǵa deıin astanada keminde 30 halyqaralyq deńgeıdegi is-shara ótkizý josparda bar», - dedi ol.
