Jyl basynan beri elordada JPB qyzmetkerleri jol qozǵalysy erejesin buzǵan 68419 júrgizýshini anyqtady
ASTANA. 2 mamyr. QazAqparat - Astana qalasy ІІD Jol polıtsııasy basqarmasynyń qyzmetkerleri 24 sáýirden bastap jol erejelerin buzyp, qasaqana aıyppul tólemegenderdi anyqtaý maqsatynda reıdtik is-sharalar ótkizdi, dep habarlaıdy astana.kz saıty.
Reıdtik is-sharalar ótkizile bastaǵannan bastap, aıyppuldy ýaqytynda tólemegen 35 avtomashına aıyppul turaǵyna qoıyldy.
«Jyl basynan beri JPB qyzmetkerleri JQE buzǵan 68419 júrgizýshini ustady. Olardyń: 7883-i jol boıyna qoqys tastaǵany úshin, 1736-sy aýany lastaǵany úshin, 1263-i jol jıegin búldirip, lastaǵany úshin, 1118-i avtokóligin las túrde júrgizgeni úshin jaýapqa tartyldy. Olarǵa jalpy kólemi 454 107 300 teńge aıyppul salynyp, 145 júrgizýshi ákimshilik qamaýǵa alyndy»,- delingen JPB baspasóz qyzmetiniń málimetinde.
Sondaı-aq, vedomstvo ákimshilik kodekstiń 524 jáne 630 baptaryna sáıkes quqyq buzýshylyqty anyqtaǵan kezde júrgizýshige ákimshilik hattama toltyryp, avtokóligin aıyppul turaǵyna qoıady. Avtomobılin júrgizýshi barlyq aıyppuldaryn túgel tólegennen keıin ǵana ala alatyndyǵyn atap kórsetedi. JQE buzǵandar 30 kún ishinde óz erikterimen aıyppul tóleýleri kerek. Eger aıyppuldy ýaqytynda tólemegen jaǵdaıda jol polıtsııasy organdary májbúrli túrde tóletý úshin materıaldardy sot oryndaýshylaryna joldaıdy.
