Jyl basynan beri elordada mas kúıde kólik júrgizgen 683 adam ustaldy
NUR-SULTAN. QazAqparat – Astanada 18-20 qarasha aralyǵynda respýblıkalyq «Qaýipsiz jol» jedel-profılaktıkalyq is-sharasy ótip jatyr, dep habarlaıdy QazAqparat Nur-Sultan qalasy Polıtsııa departamentiniń baspasóz qyzmetine silteme jasap.
Operatsııa jol-kólik oqıǵalaryn azaıtýǵa, jol qozǵalysy erejelerin buzý faktisin anyqtap, boldyrmaýǵa baǵyttalǵan. «Qaýipsiz jol» jedel-profılaktıkalyq sharasy barysynda jol-kólik oqıǵasyn boldyrmaýǵa qatysty túsindirý jumystary júrip jatyr. Іs-sharaǵa tártip saqshylarymen birge kólikti baqylaý ınspektsııasy, ákimdik, «QazAvtoJol» UK AQ, «Kazahavtodor» JShS qyzmetkerleri qatysýda. Elorda joldaryn, ásirese túngi ýaqytta baqylaıtyn patrýldik polıtsııa jasaǵynyń sany kóbeıdi. Qazirgi ýaqytta avtokólikti mas kúıde aıdaý, kólikti basyp ozý, manevr jasaý, qıylystar men jaıaý júrginshiler jolynan toqtamaı ótip ketý, qaýipsizdik beldigin taqpaý, uıaly telefonmen sóılesý syndy tártip buzý oqıǵalary tirkelip jatyr.
2020 jyldyń 10 aıynda jol qozǵalysyn baqylaý kezinde 87 myń ákimshilik quqyq buzýshylyq tirkeldi. Kólikti mas kúıde júrgizgen 683 adam ustaldy, onyń 619-yna ákimshilik tyıym salyndy. Ákimshilik sottyń sheshimimen jol erejesin buzǵan 704 adam júrgizýshi kýáliginen aıyryldy. Baǵdarshamnyń tyıym salynǵan túsine ótip ketken 945 kólik júrgizýshi tirkeldi. Sondaı-aq 8 myń jaıaý júrginshige jol erejesin buzǵany úshin jaýapkershilik júkteldi.
