Jyl basynan beri elordada «Astana esirtkisiz qala» baǵdarlamasyn iske asyrý barysynda 50 adam qylmystyq jaýapqa tartyldy
ASTANA. Sáýirdiń 23-i. QazAqparat /Aıdar Ospanalıev/ - Astana qalalyq prokýratýrasy quqyq qorǵaý organdarymen birlese otyryp, «Astana esirtkisiz qala» baǵdarlamasynyń aıasynda esirtki saýdasymen kúreske baǵyttalǵan keshendi sharalar atqarýda.
Jyl basynan beri atalmysh baǵdarlamany júzege asyrý barysynda qylmystyq jaýapqa - 50 adam, ákimshilik jaýapqa 25 adam tartylǵan, dep habarlaıdy QazAqparat.
Astana qalalyq prokýratýrasynyń Jedel-izdestirý qyzmetiniń qadaǵalaý bóliminiń bastyǵy Erkin Qozǵambaevtyń málimetterine qaraǵanda, «Astana esirtkisiz qala» baǵdarlamasynyń aıasynda ishki ister organdary zańsyz aınalymnan 72 keli 402 gramm esirtkilik zattardy alǵan. Olardyń 4 keli, 789 gramyn - geroın, 59 keli 442 gramyn - marıhýana, al 36,2 gramyn gashısh qurap otyr.
Sonymen qatar qazir qylmystyq áreketterdiń aldyn alý maqsatynda Astana qalasynyń tártip saqshylary qaladaǵy qylmys kóp jasalatyn aýdandar men aımaqtardy udaıy aralap, tekserip otyrady. Buǵan qosa jergilikti jerlerdegi aýdandardyń erekshelikteri eskerile otyryp, nashaqorlar kóp jınalatyn oryndarda tártip saqshylary aralaýy tıis qosymsha baǵyttar jasalǵan. Sondaı-aq esirtkilik zattardy jastar jınalatyn oryndarda qoldanatyn nemese ony saýdalaıtyn azamattardy anyqtaý boıynsha da tıisti sharalar atqarylýda. Al elordanyń oıyn-saýyq oryndarynda astanalyq polıtseıler 5-ten astam jedel-saýyqtyrý sharalaryn uıymdastyrǵan. «Shep» statsıonarlyq beketteriniń jumystary da kúsheıtilgen.
