Jyl basynan beri elordada 7 603 adam koronavırýspen aýyrdy
NUR-SULTAN. QazAqparat – Sońǵy táýlikte Covid-19 ınfektsııasynyń 112 jaǵdaıy tirkeldi. Bul týraly elorda ákimdiginiń baspasóz ortalyǵynda ótken onlaın brıfıngide aıtyldy, dep habarlaıdy QazAqparat tilshisi.
«Sońǵy táýlikte Covid-19 ınfektsııasynyń 112 jaǵdaıy tirkeldi. Jyl basynan beri elordada koronavırýs ınfektsııasymen 7 603 adam aýyrdy. Qańtarda 3 763 adam, aqpanda 2 811, naýryzda 1 029 adam aýyrdy. PTR testiniń teris nátıjesimen Covid-19 bolyp aýyrǵandardyń sany – 96. Qańtar aıynda 55, aqpan aıynda 28, naýryz aıynda 13 jaǵdaı tirkeldi», - deıdi Nur-Sultan qalasynyń bas memlekettik sanıtarlyq dárigeri Sarhat Beısenova.
Onyń aıtýynsha, naýqastarmen baılanysta bolǵan adamdardyń úles salmaǵynyń dınamıkalyq ósý kórsetkishi aqpan aıynda 45%, naýryz aıynda 49% bolǵan.
«Bul - adamdar aýrýdyń aldyn alý sharalaryn saqtamaıtynyn bildiredi. Qazirgi ýaqytta qalada 912 juqtyrý oshaǵy bar. Onda naýqaspen baılanysta bolǵan 2 500 adam baqylaýda», - deıdi ol.
Eske sala ketsek, buǵan deıin elordada Covid-19-ben syrqattaný deńgeıi 9,9%-ǵa artqany týraly jazdyq.
