Jyl basynan beri elordada 570 júrgizýshi kólik basqarý quqyǵynan aıyryldy
Іs-shara jol apattary men jol qozǵalysy erejelerin óreskel buzý jaǵdaılarynyń aldyn alý maqsatynda ótkiziledi.
«Polıtsııa departamenti elorda joldarynda jol qozǵalysy qaýipsizdigin qamtamasyz etýge baǵyttalǵan is-sharalardy júzege asyrýda. Jol apattaryna júrgizilgen taldaýǵa sáıkes, beketterdiń ornalasýyna jáne saptyq bólimshelerdiń patrýldeý baǵyttaryna túzetýler engiziledi. «Mas júrgizýshi», «Avtobýs», «Quqyq tártibi», «Nazar aýdaryńyz, baǵdarsham!», «Abaılańyz, balalar» jáne t.b. júrgizýshiler arasynda kólik tártibin qadaǵalaýǵa baǵyttalǵan profılaktıkalyq is-sharalar únemi júrgiziledi. Jol júrisin qadaǵalaýdy júzege asyrý kezinde apattyń jaı-kúıine áser etetin jol júrisi qaǵıdalaryn óreskel buzýǵa erekshe nazar aýdarylady», - deıdi elordanyń jergilikti polıtsııa qyzmeti basqarmasynyń bastyǵy Arman Aıtmaǵambetov.
Aǵymdaǵy jyldyń basynan beri jaǵdaıǵa júrgizilgen taldaýǵa sáıkes, Nur-Sultanda 48 myńnan astam jol qozǵalysy erejelerin buzý áreketi anyqtaldy. Kólikti mas kúıinde basqarǵany úshin 500 júrgizýshi ustaldy. Apatty jaǵdaı týǵyzǵany úshin 545 júrgizýshi ákimshilik jaýapqa tartyldy. Belgilenbegen oryndarǵa kóshkeni úshin 5,5 myńnan astam jaıaý júrginshige aıyppul salyndy. Sot sheshimi boıynsha 570 júrgizýshi kólik quralyn basqarý quqyǵynan aıyryldy, 455 adam qamaýǵa alyndy.
Jaqynda qyzmetkerler kólik júrgizý quqyǵynan aıyrylǵan júrgizýshini ustady. Polıtsııaǵa kýágerlerden mas júrgizýshi «BMW» markaly kólikti júrgizip kele jatqany týraly habarlama kelip tústi.
Patrýldeý barysynda polıtsııa qyzmetkerleri saǵat 08.00-de Jubanov kóshesinde mas kúıinde 24 jastaǵy júrgizýshini ustady. Jigit qashpaq bolǵanymen, polıtsııa der kezinde ustady.
Júrgizýshi medıtsınalyq kýálandyrýdan ótýden bas tartyp, QR JQE 2.1.4-tarmaǵyn buzdy. Atalǵan fakti boıynsha tártip buzýshy polıtsııaǵa odan ári tergeý úshin jetkizildi.
Qujattardy tekserý kezinde 2020 jyldyń qazan aıynda Qaraǵandy qalasy sotynyń sheshimimen júrgizýshi 7 jyl merzimge júrgizýshi kýáliginen aıyrylǵany belgili boldy. Medıtsınalyq kýálandyrý aktisine sáıkes júrgizýshi jeńil dárejede mas bolǵan.
Alaıda jazaǵa qaramastan, júrgizýshi mas kúıinde kólik júrgizgen. Atalǵan fakti boıynsha tártip buzýshy DP ýaqytsha ustaý ızolıatoryna qamaldy. QR QK 346-baby 1-bóligi (Kólik quralyn júrgizý quqyǵynan aıyrylǵan jáne alkogolden, esirtkiden jáne (nemese) ýytqumarlyqtan masań kúıdegi adamnyń kólik quralyn basqarýy...«) boıynsha tergeý júrgizilýde. Sot sheshimi boıynsha, tergeý júrgizý kezeńinde júrgizýshi 2 aıǵa deıin qamaýǵa alynady.