Jyl basynan beri elordada 28 bala terezeden qulap ketken - TJD
NUR-SULTAN. QazAqparat - 2020 jyldyń basynan beri Nur-Sultanda balalardyń terezeden qulaý jaǵdaıy 28 ret tirkelgen. Bul týraly Nur-Sultan qalalyq Tótenshe jaǵdaılar bóliminiń bastyǵy Erkin Otarǵalymuly onlaın brıfıng barysynda aıtty, dep habarlaıdy QazAqparat tilshisi.
«Jalpy, 2-7 jas aralyǵyndaǵy balalarda terezeden qulaý qaýpi joǵary. Balalardyń terezelerden qulaýynyń basty sebebi - olardy ashyq tereze aldynda qaraýsyz qaldyrý. Ókinishke qaraı, úıde eshkimniń qadaǵalaýynsyz otyrǵan bala aýlada oınap júrgen balalardyń daýysyn estıdi. Daýysqa eleńdegen bala terezege qaraı barady. Osyǵan oraı, qurmetti ata-analar, men sizderge birneshe usynys aıtqym keledi. Birinshiden, balanyń terezeden qulap ketýine jol bermeý úshin olardy qaraýsyz qaldyrýǵa múldem bolmaıdy. Ekinshiden, jıhazdy bala terezege ózdiginen kóterilip shyǵa almaıtyndaı etip ornalastyrý qajet. Úshinshiden, masadan qorǵaıtyn tor balany terezeden qulap ketýden saqtaı almaıtynyn este saqtaý kerek. Kelesi másele - terezege buǵat ornatý kerek. Sonymen qatar, balalarǵa tereze aldynda oınaýǵa bolmaıtyny týraly aıtý kerek. Qurmetti ata-ana, eger siz osy erejelerdi saqtaıtyn bolsańyz, balańyzdyń ómirin saqtap qala alasyz», - dedi Erkin Otarǵalymuly.
Onyń aıtýynsha, 2018 jyldan beri elordada balalardyń terezeden qulaý oqıǵasyna qatysty 70 jaǵdaı tirkelgen. 16 bala terezeden qulap mert bolsa, 54 bala jaraqat alǵan. Tek bıyldyń ózinde osyndaı 28 jaǵdaı tirkeldi.
«Qurylys alańdarynda eresekterdiń bıiktikten qulap ketý jaǵdaıy sany ósip keledi. 2020 jyldyń basynan beri osyndaı 14 oqıǵa tirkeldi. 14 qyrkúıekte kiltin úıinde umytyp ketken astana turǵyny páterge parapet arqyly kirmek bolyp, qulap ketken. Altynshy qabattan qulaǵan er adam oqıǵa ornynda kóz jumdy», - deıdi ol.
