Jyl basynan beri elorda aýmaǵynda esirtki satylatyn 46 núkte men 3 prıton joıyldy - ІІD
ASTANA. Jeltoqsannyń 25-i. QazAqparat /Jasulan Amanbaıuly/ - 2009 jyly tártip saqshylary elorda aýmaǵynda esirtki satylatyn 46 núkte men 3 prıtondy anyqtap, zańsyz aınalymnan 115 keli esirtki tárkilegen.
Bul týraly búgin Astana qalalyq ІІD-niń Esirtki bıznesine qarsy kúres basqarmasynyń bastyǵy Aıasyn Baıdildaev Qoǵamdyq keńestiń otyrysy barysynda málim etti, dep habarlaıdy QazAqparat.
Jedel aldyn alý sharalary barysynda Astana qalasynda 2 esirtki arnasy joıyldy. Basqarma qyzmetkerleri aǵymdaǵy jyldyń 11 aıynda esirtkige baılanysty 252 qylmystyq is qozǵaǵan. Sonyń - 68-i esirtki saýdasy.
Qalada esirtki bıznesine baılanysty 1 uıymdasqan qylmystyq top ustalǵan.
«Tamyz aıynda Astanada Kantemirov qurǵan uıymdasqan qylmystyq top áshkerelendi. Ol óziniń qylmystyq tobynyń qataryna jaqyn týystaryn, ıaǵnı eki baýyryn jáne kúıeý balasyn alǵan. Olar óz kezeginde Kantemirovtiń basshylyǵymen zańsyz esirtki saýdasymen aınalysyp otyrǵan. Sonymen qatar Astana qalasy men Aqmola oblysynyń aýmaǵynda ornalasqan túrmelerge esirtki jetkizýmen aınalysyp kelgen», dedi basqarma bastyǵy. Onyń aıtýynsha, olarǵa qatysty 8 qylmystyq is qozǵaldy, sonyń ishinde 4 is esirtki satý faktisi boıynsha. Qazir toptyń basshysyna qylmystyq top qurǵany úshin qylmystyq is qozǵaldy.
Al elordanyń oıyn-saýyq oryndarynda 59 reıd júrgizildi. Mysaly, «Laın» túngi klýbynyń ıesi jaýapqa tartylyp, oǵan 50 aılyq eseptik kórsetkish boıynsha aıyp salyndy, klýbtyń jumysy 14 kúnge toqtatyldy.
Qoǵamdyq keńes otyrysy osymen tórtinshi ret ótip otyr. Oǵan qalanyń zańgerleri, redaktorlar klýbynyń músheleri, «Nur Otan» HDP-niń qalalyq fılıaldarynyń ókilderi kirgen. Keńes jıyndarynda ІІD-niń jumysy men polıtseılerdiń ár saladaǵy qyzmeti talqylanady. Astana q. ІІD-niń bastyǵy Marat Bıtenovtiń tóraǵalyǵymen ótken qoǵamdyq keńestiń otyrysy barysynda nashaqorlyqtyń aldyn alý máseleleri sóz boldy.
