Jyl basynan beri elimizdiń eksporty 10,8 paıyzǵa tómendep, ımport 10,3 paıyzǵa artty - Ekonomıka mınıstri
ASTANA. 23 shilde. QazAqparat - Jyl basynan beri elimizdiń eksporty 10,8 paıyzǵa tómendep, ımport 10,3 paıyzǵa artty.
Bul týraly búgin aǵymdaǵy jyldyń birinshi jartyjyldyǵyndaǵy áleýmettik-ekonomıkalyq damý qorytyndylary talqylanǵan Úkimet otyrysynda Ekonomıka jáne bıýdjettik josparlaý mınıstri Erbolat Dosaev málim etti.
Mınıstrdiń aıtýynsha, esepti kezeńde eldiń eksporty 10,8 paıyzǵa tómendegen. Bul rette úshinshi elderge eksporttyń fızıkalyq jáne nomınaldy kórsetkishteri 7,5 paıyzǵa jáne 6 paıyzǵa kemigen.
«Sonymen qatar, jyl basynan beri álemdik naryqta munaı baǵasy 8,7 paıyzǵa, temirge baǵa 16,8 paıyzǵa tómendedi. Shıki munaı eksporty 5,5 paıyzǵa, ferroqorytpalar - 10,8 paıyzǵa, myrysh - 18,7 paıyzǵa, bıdaı - 61,3 paıyzǵa azaıdy. Bul rette taýar ımporty 10,3 paıyzǵa artty», - deıdi E. Dosaev.
Onyń aıtýynsha, Kedendik odaq elderimen qańtar-mamyr aılary aralyǵyndaǵy ózara saýda aınalymy 1,8 paıyzǵa artyp, 9,4 mlrd. dollardy quraǵan. Onyń ishinde eksport 2,7 paıyzǵa qysqaryp, ımport 3,7 paıyzǵa artyp otyr.
