Jyl basynan beri elimizde eń kóp satylǵan kólik brendteri anyqtaldy
NUR-SULTAN. QazAqparat –2020 jyldyń qańtar-sáýir aılary aralyǵynda Qazaqstanda resmı dılerler 18 myńnan astam jańa kólik satty. Bul týraly QazAqparat «QazAvtoÓnerkásip» avtokólik salasyndaǵy kásiporyndar odaǵyna silteme jasap habarlaıdy.
«Atalǵan kezeńde resmı dılerler 18 368 kólikti satty. Bul bir jyl burynǵy kórsetkishten 2,7 paıyzǵa tómen. Qańtar-sáýir aılarynda qazaqstandyqtar jańa jeńil kólikterdi alýǵa 169,3 mlrd teńge jumsap, 2019 jylǵy deńgeıden 4,9 paıyzǵa az boldy», - delingen taratylǵan málimette.
Kólik satyp alýshy 11 709 adam (63,7 paıyzy) otandyq zaýyttardyń ónimi boıynsha óz tańdaýyn jasaǵan. Sonymen qatar, bıylǵy tórt aıda satylǵan 6 659 avtomobıl (36,3 paıyzy) ımportqa tıesili bolyp otyr.
Atalǵan merzimde elimizde suranysy joǵary brendterdiń arasynda Lada (3711 kólik), Hyundai (3171), Toyota (2877 ), KIA (1952) jáne Ravon (1890) markaly kólikteri kósh bastady.
Munymen qosa, jaqsy ótkizilgen TOR-10 quramyna Renault (812 kólik), GAZ (664), Nissan (659), Volkswagen (516) men UAZ (412) endi.
foto: azh.kz