Jyl basynan beri elimizde 4,6 mln sharshy metr turǵyn úı salyndy
NUR-SULTAN. QazAqparat - Qazaqstanda 2019 jyldyń basynan beri 4,6 mln sharshy metr turǵyn úı salyndy, dep habarlaıdy QazAqparat QR ındýstrııa jáne ınfraqurylymdyq damý mınıstrliginiń baspasóz qyzmetine silteme jasap.
Respýblıka boıynsha barlyǵy 40 546 turǵyn úı tapsyryldy. Turǵyn úıdi iske qosý kóleminiń ósýi ótken jylmen salystyrǵanda respýblıkanyń 15 óńirinde jalǵasýda. Bul týraly Úkimet otyrysynda Indýstrııa jáne ınfraqurylymdyq damý mınıstri Roman Sklıar málimdedi.
Turǵyn úıdi paıdalanýǵa berý boıynsha kóshbasshy - Túrkistan (132,0%), Pavlodar (127,2%), Almaty (123,2%), Qyzylorda (122,4%), Aqmola (116,9%), Jambyl (114,9%), Atyraý (114,1%), Qaraǵandy (113,9%),Qostanaı (105,8%), Aqtóbe (105,5%) oblystary.
«Qurylys boıynsha naqty kólem ındeksi qańtar-mamyr aılarynda 108,8% qurady. 15 óńirde oń dınamıka baıqalady. Kóshbasshylar -Qaraǵandy (153,7%), Atyraý (129%), Túrkistan (122,5%), BQO (115,5%), Aqtóbe (112,1%), ShQO (110,4%), Qostanaı (109,9%), Pavlodar oblystary (107,8%), SQO (107,7%), Almaty q. (105,8%) jáne Shymkent qalasy (105,1%)», - deıdi mınıstr.
Sonymen qatar, QR IIDM basshysy kólik kesheni boıynsha 2019 jyldyń qańtar-mamyr aılarynda naqty kólem ındeksi 105,3%quraǵanyn habarlady. Jalpy alǵanda kóliktiń barlyq túrlerimen júk tasymaldaý kóleminiń 3,7%-ǵa ósýi baıqalady. Qazaqstan arqyly konteınerlik tasymaldardyń jalpy kólemi ótken jyldyń osy kezeńimen salystyrǵanda 47%-ǵa ósip, 240 myń JFE qurady (jıyrma fýnttyq ekvıvalent - júk KQ syıymdylyǵyn ólsheýdiń shartty birligi - red.).
Kómir men lıgnıt óndirý kólemi 95,8% qurady. Negizgi kómir óndirýshi kásiporyndarda kómir óndirýdiń tómendeýi elektr stantsııalarynyń kómir ónimderin tutynýdyń qysqarýymen baılanysty.
Óńdeý ónerkásibi boıynsha jeńil ónerkásip salasynda +23%, mashına jasaý salasynda +16%, farmatsevtıka ónerkásibinde +11,6%, daıyn metall buıymdary boıynsha +9,2%, qurylys materıaldary boıynsha +3,4% óskeni baıqalady.
