Jyl basynan beri elimizde 14 halyqaralyq jáne 19 óńirlik esirtki arnalary joıylǵan
Bul málimetterdi QazAqparat QR Ulttyq qaýipsizdik komıtetiniń baspasóz qyzmetine silteme jasap habarlaıdy.
Baspasóz qyzmetiniń málimetterine qaraǵanda UQK jyl basynan 79 esirtkige qarsy operatsııa ótkizdi. Onyń ishinde birqatar operatsııalar Reseı, Qyrǵyzstan, Ózbekstan, Indonezııa, AQSh jáne Avstralııanyń quzyretti organdarymen birge júrgizildi.
14 halyqaralyq jáne 19 óńirlik esirtki trafıkteriniń arnalary joıyldy.
Zańsyz aınalymnan 671.1 kg psıhotroptyq zattar (onyń ishinde 176 «LSD» jáne «MDMA» tabletkalary), 11 keli geroın, 57.8 keli apıyn, 164.6 keli gashısh, 590.6 keli marıhýana, 100 metadon tabletkalary, 21 tonnadan astam kóknár shıkizaty, sondaı-aq 44.8 tonnadan astam hımııalyq reagentter alyndy.
Psıhotroptyq zattar óndiretin 17 iri jasyryn tsehtyń jumysy toqtatyldy, 440 keli «sıntetıka» tárkilendi.
Tek sońǵy aıda 3 halyqaralyq jáne 2 óńirlik esirtki arnalarynyń joly kesildi. Bir esirtki zerthanasy joıyldy. Zańsyz aınalymnan 368.8 keli esirtki jáne 500 keli hımııalyq prekýrsorlar alyndy.
«Azamattardy halyqaralyq esirtki bıznesiniń keri áserinen qorǵaý boıynsha is-sharalar jalǵasýda»,-delingen habarlamada.
