Jyl basynan beri elimizde 1130 adam tótenshe jaǵdaılar saldarynan mert boldy
ASTANA. 5 qazan. QazAqparat - 2012 jyldyń basynan beri elimizde tótenshe jaǵdaılar kezinde 3410 adam zardap shegip, 1130 adam qaza tapty.
Materıaldyq shyǵyn 3 mlrd. 458 mln. teńgeni quraıdy. Bul týraly búgin Tótenshe jaǵdaılardyń aldyn alý jáne joıý jónindegi memlekettik komıssııanyń otyrysynda QR Tótenshe jaǵdaılar mınıstri Vladımır Bojko málim etti.
Sonymen qatar mınıstrdiń sózine qaraǵanda, tabıǵı sıpattaǵy tótenshe oqıǵalar 2312 ret tirkelgen. Bul jalpy tótenshe oqıǵalar sanynyń 18,3 paıyzyna teń. Al osy oqıǵalar kezinde 1997 adam zardap shekse, 497 adam qaza tapqan.
Memlekettik komıssııa otyrysynda maýsymdyq tasqyn men sý tasqynyna, selge, kóshkinge, órtke, jer silkinisine qarsy turý, olardyń zardaptar joıý máseleleri egjeı-tejeıli talqylanýda. Alqaly jıynǵa ortalyq memlekettik organdardyń, oblystar men Almaty, Astana qalalary ákimdikteriniń ókilderi, QR TJM qurylymdyq jáne vedomstvolyq bólimderiniń basshylary qatysýda.
