Jyl basynan beri balasyn qaraýsyz qaldyrǵan 41 ata-ana ákimshilik jaýapqa tartylǵan

NUR-SULTAN. QazAqparat – Jyl basynan beri balasyn qaraýsyz qaldyrý boıynsha ata-analardyń ústinen 41 ákimshilik is qozǵalǵan, habarlaıdy QazAqparat tilshisi.

Bul týraly Azamattyq qorǵanys jáne áskerı bólimder komıtetiniń tóraǵasy Baýyrjan Syzdyqov ortalyq kommýnıkatsııalar qyzmetinde ótken brıfıngide aıtty.

«Polıtsııa ókilderimen birge patrýl, reıd jasaǵan kezde qaraýsyz qalǵan balalardy tapsaq nemese sýǵa batyp bara jatqan balalar qutqarǵan jaǵdaıda olardyń ata-analaryna mindetti túrde ákimshilik is qozǵalady. 2231 adam shomylý kezinde zań búzǵan bolsa, sonyń ishinde 41 adamǵa balalarǵa jaýapsyz qaraǵany úshin ákimshilik is qozǵalyp otyr», - dedi TJM ókili.

BAQ ókiliniń saýalyna jaýap bere otyryp, Baýyrjan Syzdyqov jaýapsyz ata-analarǵa damyǵan elderde qoldanylatyn sharalarǵa toqtaldy.

«Dúnıejúzindegi tájirıbege qarasaq, búgingi tańda Germanııada, Ulybrıtanııada, AQSh-ta balasyn qaraýsyz qaldyrǵany úshin ata-anasynyń ústinen qylmystyq is qozǵalady. Másele ata-anaǵa qoldanatyn sharada emes. Aıyppul salyp, qylmystyq is qozǵaý balanyń ómirine tóngen qaýiptiń qasynda eshteńe emes. Sondyqtan ata-analarǵa balasynyń qaýipsizdigi úshin tótenshe jaǵdaı qyzmetiniń ókilderimen birlesip áreket etýge, jas býyndy qaýip-qaterden birge qorǵaýǵa shaqyramyn», - dedi komıtet tóraǵasy.