Jyl basynan beri balalarǵa 600-ge jýyq joǵary tehnologııalyq operatsııa jasaldy
Bul týraly Áleýmettik medıtsınalyq saqtandyrý qorynyń Almaty fılıaly málim etti.
Joǵary tehnologııalyq medıtsınalyq qyzmetter (JTMQ) dıagnostıka men emdeýdiń ınnovatsııalyq, biregeı ádisteriniń kómegimen júrgiziledi.
JTMQ-men emdeletin balalarda jıi kezdesetin dıagnozdar - qanaınalym júıesi, genıtýrarly júıe, asqorytý, endokrındik júıeleriniń aýrýlary jáne týa bitken aqaýlar.
Jyl basynan beri 198 bala kohlearlyq estý apparattaryn ımplantatsııalaýdyń arqasynda estý múmkindigine ıe boldy.
172 patsıent júrek qyzmetin qalpyna keltirdi, 67 balanyń nesep-jynys júıesi organdarynda ota jasalyndy.
Qazaqstandyq mamandar qan men súıek kemiginiń onkologııalyq aýrýlaryn emdeý kezinde 22 allogendik jáne 5 aýtologııalyq súıek kemigin transplantatsııalaýdy júrgizdi.
«Taǵy 9 balanyń baýyry transplantatsııalanǵan, eki balaǵa mı isikteri kezinde kúrdeli neırohırýrgııalyq ota jasaldy. Eń kóp joǵary tehnologııalyq medıtsınalyq kómek Nur-Sultan men Almaty qalalarynda kórsetildi. 2021 jyldyń 8 aıynda elordada balalarǵa - 278, Almatyda - 252 joǵary tehnologııalyq ota jasaldy. El ishinde medıtsınalyq tehnologııalardy damytý - balalarǵa shetelge emdelýge shyqpaı-aq em alýdyń múmkindigi», - delingen habarlamada.
JTMQ alýǵa jiberý týraly sheshimdi patsıentti joǵary tehnologııalyq medıtsınalyq kómek kórsetetin qandaı da bir medıtsınalyq uıymǵa jiberý máselesin sheshý úshin beıindi mamandar kiretin jergilikti densaýlyq saqtaý basqarmasynyń basshysy qurǵan arnaıy komıssııa qabyldaıdy.
Budan ári medıtsınalyq uıym patsıenttiń tirkelgen jeri boıynsha qujattar paketin JTMQ komıssııasynyń qaraýyna jiberedi.
Sodan keıin komıssııa qujattardy qaraıdy. Joldamanyń negizdiligin aıqyndaıdy jáne hattamaǵa resimdeı otyryp, sheshim qabyldaıtyn bolady.
Oń sheshim qabyldanǵan jaǵdaıda JTMQ komıssııasy emdeýge jatqyzýǵa joldamany patsıenttiń qujattar paketin qosa bere otyryp, «Emdeýge jatqyzý bıýrosy» portalynda tirkeıdi.
