Jyl basynan beri aýyl sharýashylyǵynda 1,1 trln teńgeniń ónimi óndirildi - mınıstrlik

NUR-SULTAN. QazAqparat - Aǵymdaǵy jyldyń qańtar-mamyr aılarynda aýyl sharýashylyǵy alasynyń jalpy ónim kólemi 3,1%-ǵa artyp, 1 110 mlrd. teńgeni qurady, dep habarlady QR Aýyl sharýashylyǵy mınıstrliginiń baspasóz qyzmeti.

Ósim negizinen mal sharýashylyǵyndaǵy óndiris kóleminiń 3,2%-ǵa ulǵaıýy (1 039,4 mlrd. teńge) esebinen qamtamasyz etildi. Atap aıtqanda, et óndirý kólemi tirideı salmaqta 5,5%-ǵa, sút óndirisi 3,1%-ǵa ósti.

Atalǵan kezeńde ósimdik sharýashylyǵy ónimderi 58,3 mlrd. teńgege óndirilip, naqty kólem ındeksi 100%-dy qurady. Bul kólem aýyl sharýashylyǵy daqyldaryn jabyq topyraqta (jylyjaıda) ósirý esebinen qamtamasyz etildi.

Oblystar boıynsha respýblıkalyq deńgeıden joǵary qarqyn tórt oblysta baıqaldy: Aqmola – 113,8%, Pavlodar – 103,9%, Batys Qazaqstan jáne Qaraǵandy-103,3%.