Jyl basynan beri Atyraý oblysyna Reseıden kelgen 54 júrgizýshiden koronavırýs anyqtaldy

ATYRAÝ. QazAqparat – Atyraý oblysyna byltyrdan beri Qazaqstan-Reseı shekarasyndaǵy avtoótkelden 80 308 adam ótken, dep habarlaıdy QazAqparat.

Oblystyq sanıtarlyq-epıdemıologııalyq baqylaý departamenti baspasóz qyzmetiniń málimetine súıensek, kooronavırýs ınfektsııasyna baılanysty shekteý engizilgennen beri Qazaqstan-Reseı shekarasyndaǵy «Qurmanǵazy» avtoótkeli arqyly ótýshilerge monıtorıng júrgiziledi.

«Shekteý sharalary engizilgen kezden bıylǵy 7 qarashaǵa deıin Atyraý oblysyna «Qurmanǵazy» avtoótkeli arqyly memlekettik shekaradan 80 308 adam ótti. Onyń ishinde 14 840 jaıaý júrginshi men 65 468 júrgizýshi bar. Oblys aýmaǵyna kirýge anyqtamasyz kelgen 411 shetel azamatyna tyıym salyndy. Anyqtamasy bolmaǵan Qazaqstan Respýblıkasynyń 5 759 azamatyna Covid-19 ınfektsııasyna qarsy PTR-testileý júrgizildi. Nátıjesinde 54 júrgizýshi men 5 jolaýshydan koronavırýs ınfektsııasy anyqtaldy» -dep habarlady departamenttiń baspasóz qyzmeti.

Al, 7 qarashada atalǵan avtoótkelden 25 jolaýshy men halyqaralyq baǵytta júk tasymaldaıtyn 175 júrgizýshi ótken. Avtoótkelge anyqtamasyz kelgen 6 qazaqstandyqtan qaýipti vırýsqa qarsy alynǵan PTR-testileý qorytyndysy teris nátıje kórsetken.

Eske sala ketelik, budan buryn Atyraý oblysynda koronavırýsten bir adam qaıtys bolǵanyn jazǵan edik.