Jyl basynan beri astanada 456 órt oqıǵasy tirkelgen
NUR-SULTAN. QazAqparat – Jyl basynan beri elorda aýmaǵynda 456 órt tirkelgen. Bul týraly Nur-Sultan qalasy Memlekettik órt baqylaý basqarmasynyń bastyǵy Erkin Otarǵalymuly málim etti, dep habarlaıdy QazAqparat tilshisi.
«Jyl basynan beri qala aýmaǵynda 456 órt faktisi tirkeldi. Onyń ishinde 150-i jeke turǵyn úı sektorynda. Órtterden 10 adam qutqarylyp, 26-sy qaýipsiz aýmaqqa kóshirildi. Statıstıkaǵa sáıkes, órtterdiń aıtarlyqtaı bóligi jeke sektolarda bolady. Sondyqtan, qalalyq quzyrly organ jylytý maýsymy bastalar aldynda órt qaýipsizdigi aılyǵyn ótkizedi. Bıyl bul sharalar 15 tamyzda bastaldy», - dedi Erkin Otarǵalymuly.
Basqarma basshysynyń dereginshe, órt qaýipsizdigi aılyǵy úsh kezeń boıynsha ótedi. Birinshi kezekte áleýmettik osal topqa jatatyn azamattardyń baspanalary tekseriledi. Elordada osyndaı sanattaǵy 1 240 otbasy bar. Kelesi kezekte qala aýmaǵynda tirkelgen 10 myńǵa jýyq saıajaılarǵa qaýipsizdik sharalary túsindiriledi. Odan keıin shaharda ornalasqan barlyq turǵyn úılerdi aralap, oqys oqıǵalardyń aldyn alýǵa baǵyttalǵan úgit-nasıhat jumystary júrgiziledi.
