Jyl basynan beri Astanada 12 myń jaıaý júrginshige aıyppul salyndy
ASTANA. 19 shilde. QazAqparat - Jol polıtsııasy basqarmasynyń statıstıkalyq málimetterine sáıkes búgingi tańda 12 myń jaıaý júrginshiniń zań buzýshylyǵy tirkeldi,
dep habarlady JPB baspasóz qyzmetinen.
Jaıaý júrginshiler kóbine tyıym salynǵan jerlermen jáne baǵdarshamnyń qyzyl shamyna qaramastan ótedi. Kún saıyn jol ınspektorlary ereje buzǵan 30-50 jaıaý júrginshini anyqtaıdy.
«Jol polıtsııasy qabyldaǵan profılaktıkalyq sharalarǵa qaramastan jaıaý júrginshiler jol qozǵalysy erejelerin elemeı, jol-kólik oqıǵasyna jıi sebep bolady. Ústimizdegi jyldyń 6 aıynda jaıaý júrginshilerdiń kinásinen 74 kólik apaty oryn aldy, 7 adam qaza taýyp, 70 adam zardap shekti. Jaıaý júrginshilerdiń qatysýymen bolǵan JKO-nyń úles salmaǵy jalpy kólemniń 60 paıyzyn quraıdy»,- dep habarlady vedomstvodan.
Elordanyń resmı saıtynyń jazýynsha, Astanada apatty azaıtý jáne onyń aldyn alý maqsatynda ár aptanyń jumasynda «Jaıaý júrginshilerdiń qaýipsizdigi» profılaktıkalyq kúni ótkiziledi. Kúni boıy tyıym salynǵan jerlerden ótip, buzýshylyqqa jol bergen jaıaý júrginshilerge erekshe nazar aýdarylady.
Jol polıtsııasy basqarmasy qoldanystaǵy ákimshilik zańnamaǵa (QR ÁPK 473-bap) sáıkes jaıaý júrginshilerdiń erejelerdi buzǵany úshin bes aılyq eseptik kórsetkish (8655 teńge) kóleminde aıyppul qarastyrylǵanyn eske salady. Júıeli buzýshylyqtar úshin jaıaý júrginshilerge 15 AEK kóleminde (25 965 teńge) aıyppul salynady nemese úsh táýlikke ákimshilik qamaýǵa alynady.
