Jyl basynan beri Astana qalasynda esirtki qylmysyna qatysty 180 qylmystyq is qozǵaldy - O.Ábdikárimov
ASTANA. Tamyzdyń 31-i. QazAqparat /Gúlmıra Álıakparova/ - 2010 jyldyń basynan beri Astana qalasynda esirtki qylmysyna qatysty 180 qylmystyq is qozǵaldy. Bul týraly búgin ótken brıfıngte qalalyq Іshki ister departamentiniń Esirtki bıznesine qarsy kúres basqarmasy bastyǵynyń orynbasary Oljas Ábdikárimov málim etti.
Onyń aıtýynsha, 180 qylmystyq istiń 65-i - esirtki bıznesine qatysty qozǵalǵan.
«Osy kezeńde 1 esirtki prıtony anyqtalyp, onyń joly kesildi sondaı-aq, esirtki jetkiziletin 2 arna men 23 esirtki núktesi joıyldy. Zańsyz aınalymnan 114 kelige jýyq esirtki zattary alyndy, onyń 7 kelisi - geroın. Qala aýmaǵynda QR Ákimshilik quqyqbuzýshylyq týraly kodekstiń 320-shy babyna sáıkes 120 adam jaýapkershilikke tartyldy. Al zańnamanyń kúsheıtilýine baılanysty 2010 jylǵy shildeniń 1-inen bastap, Astana qalasynyń ákimshilik sotynyń sheshimimen osy bap boıynsha 34 adam qamaýǵa alyndy, 35-ine jalpy somasy 419 myń 661 teńgege aıyppul salyndy», - dep atap ótti ol.
Sondaı-aq O.Ábdikárimovtyń aıtýynsha, jyl basynan qala mańyndaǵy 6 bekette qadaǵalaýdyń kúsheıtilýi arqasynda esirtkini qala ishine alyp ótýge qatysty 75 árekettiń joly kesilgen. 10 adam qylmystyq jaýapqa, 65-i ákimshilik jýapkershilikke tartyldy. Aınalymnan 55 keliden astam esirtki zaty alyndy (2009 jyldyń sáıkes kezeńinde 52 keli).
