Jyl basynan beri astana aýmaǵynda 38 márte tabıǵı órt tutanǵan
NUR-SULTAN. QazAqparat – Jyl basynan beri Nur-Sultan qalasynyń aýmaǵynda 38 ret usaq aýqymdaǵy tabıǵı órt tirkelgen, dep habarlaıdy QazAqparat tilshisi.
Bul týraly qala ákimdiginiń aqparat alańynda ótken onlaın brıfıngide Nur-Sultan qalasy memlekettik órt baqylaý basqarmasynyń bastyǵy Erkin Otarǵalymuly málim etti.
«2022 jylǵy 25 sáýirdegi jaǵdaıy boıynsha astana aýmaǵynda 38 ret ósimdik janyp, jalpy jıyny 0,9 gektar aýmaq otqa oranǵan. Nur-Sultan aýmaǵynda orman jáne dala órtteriniń aldyn alý úshin jyldyq jospar jasalyp, 6 baǵyt boıynsha qalanyń perımetrine kúzet beketi ornatyldy. Qalanyń eń bıik ǵımarattarynda tótenshe jaǵdaılar departamentiniń kúsh-quraldardy jedel basqarý ortalyǵyna jalǵanǵan baqylaý kameralary qoıyldy. Qalanyń jasyl beldeýindegi órt belgilerin der kezinde baıqaý úshin sholý munaralary boı kóterdi. Ol munaralarda dúrbi men baılanys quraly bar ormanshylar kezekshilik atqarady», - dedi basqarma bastyǵy.
Aıtýynsha, atalǵan jedel beketter ótý qabileti joǵary tehnıkamen, aspaly qondyrǵylarmen jáne qolǵa ustaýǵa yńǵaıly órt sóndirý jaraqtarymen jabdyqtalǵan.
«Nur-Sultan qalasyndaǵy garnızonnyń bólimsheleri qala shekarasynan 25-30 shaqyrym radıýstaǵy órt oshaqtaryna áreket etedi. Bul sheńber 6 sektorǵa bólinedi. Olar: Astrahan tasjoly, Sofıev tasjoly, Qaraǵandy tasjoly, halyqaralyq áýejaı tasjoly, Qarqaraly shossesi (Atshabar aýdany) jáne Qorǵaljyn tasjoly. 31 jol talǵamaıtyn tehnıka tas-túıin daıyn. Onyń 15-i – órt sóndiretin avtotsısterna. Órt sóndirý bólimshelerinde osy tehnıkany jaraqtandyrýǵa arnalǵan 234 órt sóndirý quraly bar. Batpaqty aýmaqtarǵa adam men tehnıka jetkizýge arnalǵan qarda jáne batpaqta júre alatyn 3 TREKOL tehnıkasy daıyn tur», - dedi Erkin Otarǵalymuly.
«Qazgıdromettiń» baǵalaýynsha, elimizdiń 3 óńirinde órt qaýpi saqtalyp tur.
