Jyl basynan beri Almatynyń qutqarý qyzmetine 125 myń qońyraý túsken
ALMATY. QazAqparat – Almaty qalasy qutqarý qyzmetiniń ókilderi taýly aımaqtaǵy qaýipsizdik sharalary týraly aıtty, dep habarlaıdy QazAqparat tilshisi.
«Almaty qalasynyń qutqarý qyzmeti» memlekettik kommýnaldyq kásiporny dırektorynyń orynbasary Erjan Qańlybaevtyń aıtýynsha, adam taýǵa shyǵar aldynda aýa raıyna nazar aýdarýy kerek.
«Taýǵa bet alǵan kez kelgen adam, eń aldymen aýa raıyna mán berýi qajet. Sonymen qatar, týystary men jaqyndaryna qaıda bara jatqanyn aıtýy shart. ıAǵnı, olar bilýi tıis. Jalpy aqparat bolýy kerek. Taǵy bir aıta ketetin jáıt, árdaıym ózińizben birge 100 paıyz qýattalǵan uıaly telefondy alyp júrińiz. Qys mezgilinde 2-3 telefon bolǵany abzal. Sondaı-aq, taýly aımaqtarda tyıym salynǵan jerlerge barmaǵan jón. Sozylmaly aýrýlary bar adamdarǵa jaıaý serýendeýden bas tartqan durys nemese qolaıly sátti tańdaǵan jón», - dedi Erjan Qańlybaev.
Respýblıkalyq jedel-qutqarý jasaǵy qutqarý bóliminiń basshysy Sergeı Tolkýnovtyń aıtýynsha, qazirgi kezde adamdar óz múmkindikterin asyra baǵalaıdy.
«Keı adamdar eshqandaı baǵyt-baǵdarsyz, daıyndyqsyz, tústen keıin taýǵa serýenge shyǵady. Olarǵa bári ońaı sııaqty kórinedi. Alaıda, olaı isteýge bolmaıdy. Taýda qıyndyqqa tap bolǵan adamdarǵa aıtarym - óz betińizshe eshqandaı sheshim qabyldamańyzdar. Birden qutqarý qyzmetine habarlasý kerek. Osy arqyly ýaqytty únemdep, tez kómek alasyz»,– deıdi ol.
Sonymen qatar, mamandar taýda balalarǵa muqııat bolýǵa shaqyrdy.
«Eger Siz balalardy ertip alsańyz, olarǵa muqııat bolyńyz. Balalar árqashan úlkenderdiń aldynda júrýi tıis. Olardyń aıaǵy taıyp ketýi múmkin nemese shuńqyrlarǵa túsip ketedi. Sondaı-aq, úlkenderdiń spırttik ishimdikten bas tartqany jón. Bul óte mańyzdy», - deıdi respýblıkalyq jedel-qutqarý jasaǵynyń bas qutqarýshysy Estaı Álimjanov.
1 qańtardan 13 qazanyna deıingi aralyqta «109» biryńǵaı telefon nómiriniń táýlik boıǵy kezekshilik-dıspetcherlik qyzmeti Almaty qalasynyń turǵyndary men qonaqtarynan 125 myńnan astam qońyraý qabyldap, óńdegen.
Kásiporyn bólimsheleri 16658 shaqyrtýǵa shyqty.
