Jyl basynan beri Almatyda kóshi-qon zańnamasyn buzýshylarǵa 134 mln. teńge aıyppul salyndy
ALMATY. 1 jeltoqsan. QazAqparat /Názıra Eleýhan/ - Elimizge kelýshi sheteldikterdiń sany kúnnen-kúnge óse túsýde. Osyǵan oraı, Almaty qalasynyń ІІD Kóshi-qon polıtsııasy basqarmasy sheteldikterdi tirkeý,
sonymen qatar sheteldik qonaqtardyń kóptep kelýi múmkin degen ónerkásip nysandaryna baqylaýdy kúsheıtip otyr, dep habarlaıdy Almaty qalasynyń ІІD-i.
Búgingi tańda tek Almatyǵa ýaqytsha kelýshilerdiń sany 177 myń 425 adamdy qurasa, onyń ishinde TMD azamattary 140 myń 828 jáne 36 myń 597 azamattar alys shetel elderinen kelgender bolyp otyr.
«Zańsyz kóshi-qonnyń jolyn kesý jumystary belsendi túrde júrgizilýde. Kóptegen gastarbaıterler turaqty meken-jaıy bolmasa da jumystyń azdyǵyna qaramastan qylmystyq ahýaldy shıelenistire túsýge yqpal etýde»,- deıdi Almaty qalalyq ІІD Kóshi-qon polıtsııasy basqarmasynyń bólim bastyǵy, polıtsııa maıory Qýanysh Bekebaev.
Onyń aıtýynsha, zańsyz mıgratsııa, sheteldikterdi zańsyz jumysqa tartý faktilerin, sondaı-aq quqyq qorǵaýshylardyń baqylaýyndaǵy shıelenisti aımaqtardan kelgen azamattardy anyqtaý maqsatynda 2011 jyldyń on bir aıynda Almaty qalasy ІІD Kóshi-qon polıtsııa basqarmasynyń qyzmetkerlerimen 7 «Quqyq tártibi» jedel-aldyn alý is-sharasy, 2 «Mıgrant», 1 «Kelimsek» sharasy qolǵa alynǵan.
«Jekeleı aıtqanda, qalamyzda zańsyz jumys isteıtin sheteldik azamattardy anyqtaý turǵysynda bazarlar, qurylys nysandary, qonaq úıler, demalys, saýyqtyrý keshenderi, jataqhanalar jáne ózge de mekemeler tekserildi. Zańsyz kelimsekterdiń basym bóligin Ózbekstan men Qyrǵyzstan jáne Tájikstan azamattary qurap otyr. Jyl basynan kóshi-qon zańdylyǵyn buzǵan 34 myń 907 adam ustalsa, sonyń ishinde 2890-y alys sheteldik azamattar (onyń 1346-sy - Qytaı, 691-i - Túrkııa, 160-y - Aýǵanstan) bolsa, 21 myń 135-i TMD elderiniń azamattary (13568-i - Ózbekstan, 3071-i - Reseı, 3042-si - Qyrǵyzstan, 794-i - Tájikstan) bolǵan. Elimizden shyǵarylǵan sheteldik azamattardyń sany 1953 adam»,- dedi Qýanysh Bekebaev.
