Jyl basynan beri Almatyda 400-ge jýyq órt shyqqan
ALMATY. QazAqparat - Almatyda jyl basynan beri 300-den astam órt oshaǵy tirkeldi. Mundaı málimetti qalalyq TJD Órt qaýipsizdiginiń aldyn alý jáne baqylaý basqarmasynyń basshysy Marat Bekbaev keltirdi.
«2016 jyldyń basynan beri Almaty qalasynda 382 órt shyqty, onyń 207-i jeke turǵyn úıde boldy. Bul jalpy kórsetkishtiń 53 paıyzy. Atalǵan merzimde turǵyn úılerde shyqqan órtten 10 adam qaza taýyp, 34 adam zardap shekti. Tilsiz jaýdyń tutanýyna negizgi sebepterdiń biri - órt qaýipsizdiginiń saqtalmaýy. 53 jaǵdaıda atalǵan fakt sebep bolsa, 16 órt oshaǵynda ádeıi órteý belgisi anyqtaldy. 4 ret balalardyń kesirinen turǵyn úıde órt shyqty», - dedi M.Bekbaev.
Sonymen qatar, M. Bekbaev 2015-2016 jylý berý maýsymyna daıyndyq barysynda 130 514 turǵyn úı tekserilip, jalpy 15 myń adam qatysqan 215 kezdesý ótkizilgenin aıtty.
«Áleýmettik jaǵdaıy tómen otbasylar turyp jatqan úıler boıynsha 50 reıd júrgizilip, 70 adamnyń turaqty meken jaısyz ómir súrip jatqany anyqtaldy. Sonymen qatar, atalǵan shara barysynda taǵy qosymsha 60 jaǵdaıy tómen otbasy belgili boldy»,- dedi ol.
Aıta keteıik, Almaty TJD jeke turǵyn úı sektorynda turatyn qala turǵyndaryn qysqy jylytý maýsymy aldynda peshterin tekserip, tazartyp qoıýǵa keńes berdi.
