Jyl basynan beri Almatyda 355 esirtki qylmysy oryn aldy
ALMATY. 21 qyrkúıek. QazAqparat /Erbol Azanbek/ - Bıylǵy jyl basynan beri Almatyda 355 esirtki qylmysy ashylǵan. Onyń 115-i satý boıynsha.
Bul qylmystyq isterden 455 keli esirtki tárkilengen, 46 nashaqor esirtkini artyq qabyldaý saldarynan kóz jumǵan. Bul týraly búgin quqyq qorǵaý organdary ókilderiniń Q.Sátpaev atyndaǵy QazUTÝ-dyń stýdentterimen kezdesýi barysynda qalalyq ІІD-niń esirtkige qarsy kúres basqarmasynyń ókili Erbol Ábdireshev aıtty.
Onyń sózine qaraǵanda elimiz boıynsha 50 myńnan astam nashaqor tirkelgen. Al, Almatydaǵy esepte turǵan 6 myńnyń 660-y jasóspirim kórinedi.
«Bizde nashaqorlyqtyń bolýyna áser etip otyrǵan negizgi máseleniń biri - elimizdiń aýmaǵynda 1 mln 200 ga jýyq esirtki alqaby bar. Onyń ishinde áıgili Shý alqabynyń aýmaǵy 140 myń ga. quraıdy. Sonymen qatar Qazaqstan Evropa men Azııa elderin jalǵastyrýshy kópir bolǵandyqtan, tranzıttik el sanalady. Bul da nashaqorlyqtyń ósýine áser etip otyr. Ózbekstan, Qyrǵyzstan, Tájikstan arqyly Aýǵan esirtkisi bizdiń el aýmaǵyna, odan ary Evropaǵa ótedi. Kerisinshe Evropadan Azııaǵa ótetin sıntetıkalyq esirtkiler de biz úshin bas aýyrtar máseleniń biri»,- deıdi E.Ábdireshev.
Onyń aıtýynsha esirtki máselesi búkil álemniń basty problemasynyń biri. «Byltyrǵy jyly EYQU-nyń Astana sammıtinde esirtki máselesi basty taqyryptyń biri boldy. Bul búkil álemniń esirtki máselesimen bas aýyrtyp otyrǵanyn kórsetedi. ókinishke oraı budan Qazaqstan da syrt qalyp otyrǵan joq. Bul turǵyda elimizde túrli sharalar júzege asýda. Alaıda, túbegeıli ózgerister bolýy úshin qoǵam, ásirese jastar esirtkimen kúresý qajet»,- degen ol sharaǵa qatysqan jastardy esirtkimen qarsy kúresýge, salaýatty ómir saltyn ustanýǵa shaqyrdy.
