Jyl basynan beri áleýmettik járdemaqy tóleýge bıýdjetten qansha qarajat jumsaldy
Eńbek jáne halyqty áleýmettik qorǵaý mınıstrliginiń málimetinshe, 2023 jylǵy 1 tamyzdaǵy jaǵdaı boıynsha múgedektigi boıynsha MÁJ alýshylar sany shamamen 536,9 myń adam bolsa, asyraýshysynan aıyrylǵandar shamamen 186,7 myń adam bolǵan.
Múgedektigi boıynsha memlekettik áleýmettik járdemaqylardyń mólsheri múgedektiktiń tobyna jáne sebebine, sondaı-aq tıisti qarjy jylyna arnalǵan «Respýblıkalyq bıýdjet týraly» zańda belgilengen eń tómengi kúnkóris deńgeıiniń shamasyna baılanysty bolady.
Asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri qaıtys bolǵan asyraýshynyń asyraýyndaǵy adamdardyń sanyna, qaıtys bolý sebepterine jáne eń tómengi kúnkóris deńgeıine baılanysty.
Sonymen qatar múgedektigi boıynsha jáne asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri 2023 jylǵy 1 qańtardan bastap eń tómengi kúnkóris deńgeıiniń ulǵaıýyna baılanysty 8,5% - ǵa artty.
QR Áleýmettik kodeksiniń kúshine enýine baılanysty 2023 jylǵy 1 shildeden bastap MÁJ mólsheri orta eseppen qosymsha 14,5% - ǵa ındeksteldi.
Máselen, 2023 jylǵy 1 shildeden bastap jalpy aýrýdan múgedektigi boıynsha MÁJ mólsheri 1-top úshin 89 248 teńge, 2-top úshin 71 398 teńge, 3-top úshin 48 681 teńge.
Budan basqa, mindetti áleýmettik saqtandyrý júıesine qatysýshylarǵa áleýmettik táýekelder týyndaǵan jaǵdaıda MÁSQ-dan áleýmettik tólemder júzege asyrylady. 2023 jylǵy 1 tamyzdaǵy jaǵdaı boıynsha 93,7 myń adam eńbek etý qabiletinen aıyrylý boıynsha áleýmettik tólem aldy. Al asyraýshysynan aıyrylý boıynsha áleýmettik tólemdi 60,6 myńǵa jýyq otbasy aldy.
Tólemderdiń mólsheri jeke jáne mynalarǵa baılanysty: sońǵy 2 jyldaǵy MÁSQ-ǵa áleýmettik aýdarymdar júrgizilgen ortasha aılyq tabys, eńbekke qabilettiliginen aıyrylý koeffıtsıentteri, asyraýyndaǵy adamdar sany, mindetti áleýmettik saqtandyrý júıesine qatysý ótili jáne tabysty aýystyrý.
Bul tólemder respýblıkalyq bıýdjetten tólenetin uqsas járdemaqylarǵa qosymsha júzege asyrylady, olardyń mólsheri 2023 jylǵy 1 qańtardan bastap Úkimet sheshimi boıynsha 8,5% - ǵa artty. Áleýmettik kodekstiń kúshine enýine baılanysty 2023 jylǵy 1 shildeden bastap tólem mólsheri qosymsha 14,5% - ǵa ulǵaıtyldy.
2023 jylǵy 1 tamyzdaǵy jaǵdaı boıynsha eńbekke qabilettiliginen aıyrylý boıynsha áleýmettik tólemderdiń ortasha mólsheri 44 967 teńge bolsa, asyraýshysynan aıyrylý boıynsha 49 592 teńge.
