Jyl basynan beri áleýmettik mańyzy bar azyq-túlik 2,6 paıyzǵa qymbattady

NUR-SULTAN. QazAqparat – Jyl basynan áleýmettik mańyzy bar azyq-túlik taýarlarynyń baǵalary 2,6 paıyzǵa ósti. Bul týraly búgin Úkimet otyrysynda QR Saýda jáne ıntegratsııa mınıstri Baqyt Sultanov aıtty, dep habarlaıdy QazAqparat tilshisi.

«Jyl basynan bastap áleýmettik mańyzy bar azyq-túlik taýarlarynyń baǵalary 2,6 paıyzǵa ósti. Jyldyq mánde olar 13,2 paıyzǵa qymbattady. 3,3 paıyzdy eń joǵarǵy ósim Batys Qazaqstan oblysy jáne Shymkent qalasynda tirkeldi. Olardan keıin taǵy 8 óńirde elimizdegi tirkelgen ortasha deńgeıden joǵary, ıaǵnı 2,7-den 2,9 paıyzǵa deıin baǵanyń ósimine jol berildi. Bárinen buryn ımportqa táýeldi ónimderdiń, joǵary eksporttyq suranysy bar taýarlardyń, sondaı-aq maýsymaralyq kezeńde dástúrli túrde qymbattaıtyn kókónisterdiń baǵasy ósim kórsetti»,- dedi ol.

Mınıstrdiń dereginshe, jumyrtqa - óndirýdiń 8,4 paıyzǵa qysqarýy, jem men pestıtsıdterdiń 25 paıyzǵa qymbattaýy, sondaı-aq qus tumaýy taralýy saldarynan qymbattady. Al, kúnbaǵys maıy men qanttyń baǵasynyń ósimine álemdegi baǵalardyń ósýi, kórshi elderdegi egis alqaptaryn qysqarýy jáne eksport ónimniń qymbattaýy sebep boldy.

«Osyǵan oraı, Aýyl sharýashylyǵy mınıstrligi óńirlik atqarýshy organdarmen birlesip, ımportqa táýeldi taýarlar boıynsha ǵana emes, sondaı-aq eksporttyń joǵary úlesi baıqalatyn ónimder boıynsha da óndiristi barynsha ulǵaıtýy qajet», - dedi Baqyt Sultanov.