Jyl basynan beri ádilet organdarynyń 5 qyzmetkerine qatysty 4 qylmystyq is qozǵaldy
ASTANA. 3 maýsym. QazAqparat /Marlan Jıembaı/ - Aǵymdaǵy jyldyń bes aıynda ádilet organdarynyń 5 qyzmetkerine qatysty 4 qylmystyq is qozǵaldy. Bul týraly búgin elordada ótken baspasóz máslıhaty barysynda QR Ádilet mınıstrliginiń resmı ókili Erbolat Erimbet málim etti.
Onyń atap ótýinshe, Ádilet mınıstrliginde jemqorlyq quqyq buzýshylyqtyń aldyn alý baǵytynda aýqymdy jumystar júrgizilý ústinde. Atqarylǵan jumystardyń nátıjesinde ádilet organdarynyń qyzmetkerleri jasaıtyn jemqorlyq sıpattaǵy qylmystardyń sany aıtarlyqtaı tómendegen.
«Atap aıtqanda, 2011 jyldyń 5 aıynda ádilet organdarynyń 5 qyzmetkerine qatysty jemqorlyq qylmys boıynsha 4 qylmystyq is qozǵaldy. Ótken jyldyń sáıkes kezeńinde 7 tulǵaǵa qatysty 8 qylmystyq is qozǵalǵan bolatyn», - dedi resmı ókil.
Sonymen qatar aǵymdaǵy jyldyń 1 toqsanynda Ádilet mınıstrligi azamattar men zańdy tulǵalar tarapynan kelip túsken 12 ótinishti qaraǵan.
