Jyl basynan beri adam saýdasyna qatysty 65 qylmys tirkelgen

ASTANA. QazAqparat – Іshki ister mınıstriniń orynbasary Erjan Sadenovtyń málimeti boıynsha, jyl basynan beri elimizde adam saýdasymen baılanysty 65 qylmys tirkelgen, dep habarlaıdy QazAqparat.

Bul týraly ol Májilistiń zańnama jáne sot-quqyqtyq reforma komıtetine Qazaqstan zańnamasyna adam saýdasymen kúres baǵytynda usynylatyn ózgerister men túzetýlerdi tanystyrý kezinde aıtty.

«Jyl basynan beri osy baǵytta 65 qylmys tirkeldi. Onyń ishinde qanaý maqsatymen bas bostandyǵynan zańsyz aıyrýdyń bir faktisi, jezókshelikpen aınalysýǵa tartýdyń 11 faktisi (onyń ishinde kámeletke tolmaǵandar - 3 fakti), adam saýdasynyń 16 faktisi (onyń ishinde kámeletke tolmaǵandardy satýdyń 12 faktisi), «jeńgetaılyq» jáne jezókshe ustaý oryndaryn uıymdastyrýdyń 37 faktisi bar», - dedi ol.

Sondaı-aq, Erjan Sadenov jyl saıyn adam saýdasymen aınalysatyn 5 qylmystyq top áshkere bolatynyn atap ótti.

«6 adamnan turatyn uıymdasqan qylmystyq top áshkere boldy. Olar bir jyl boıy jezókshe ustaý oryndaryn uıymdastyryp, «jeńgetaılyqpen» aınalysqan. Jalpy jyl saıyn adam saýdasy salasynda 100-den astam qylmys tirkelip, 5 uıymdasqan qylmystyq toptyń joly kesiledi», - dedi vıtse-mınıstr.