Jyl basynan beri 80 tonnaǵa jýyq zańsyz aýlanǵan balyq tárkilendi

ASTANA. QazAqparat – Jyl basynan 80 tonnaǵa jýyq zańsyz aýlanǵan balyq tárkilendi. Bul týraly ІІM Ákimshilik polıtsııa komıteti Qarý aınalymyn baqylaý jáne tabıǵatty qorǵaý basqarmasynyń bastyǵy Asylbek Ydyrysov aıtty, dep habarlaıdy QazAqparat tilshisi.

«Jyl basynan bastap polıtsııa organdary 10 myńnan astam tabıǵatty qorǵaý zańnamasyn buzý áreketterin anyqtady. Olardyń 330-y boıynsha sotqa deıingi tergeý bastaldy. Budan basqa bıologııalyq resýrstar obektilerin jáne ónimderin urlaý, satyp alý nemese ótkizý faktileri boıynsha 17 materıal tirkeldi. Ákimshilik jaýapkershilikke 10 555 quqyq buzýshy tartyldy. Olarǵa somasy 89,8 mln teńgeden astam aıyppul salyndy», - dedi basqarma bastyǵy mınıstrliktiń baspasóz qyzmeti alańynda ótken brıfıngte.

Asylbek Ydyrysovtyń dereginshe, zańsyz aınalymnan shamamen 79,5 tonna balyq, onyń ishinde 5,5 tonna bekirke tuqymdas balyq, 600 sharshy metr zańsyz daıyndalǵan aǵash alyndy.

«Zańsyz ań aýlaǵany úshin zańnamamen 3 AEK-ten 3 jylǵa deıingi bas bostandyǵynan aıyrý jazasy Qylmystyq kodekste kózdelgen. Sondaı-aq 5 AEK-ten 1 myń AEK-ke deıin aıyppul túrindegi ákimshilik jaýapkershilik qarastyrylǵan», - dedi ol.