Jyl basynan beri 8 myńǵa jýyq ınternet alaıaqtyq qylmysy tirkeldi

ASTANA. QazAqparat – «Qoǵammen seriktestikte qaýipsizdikti qamtamasyz etý» tujyrymdamasy aıasynda Astanadaǵy máseleler kartasyn tanystyrǵan Іshki ister mınıstri Marat Ahmetjanov ınternette jasalǵan alaıaqtyq qylmystar jaıly statıstıkany jarııalady, dep habarlaıdy QazAqparat tilshisi.

«Búgingi tańda ınternet alaıaqtyq qylmystary ózekti. Sońǵy 5 jylda onyń sany 10 ese ósti. Bıyl 7 800-den astam ınternet-alaıaqtyq qylmysy tirkeldi. Sonyń ishinde ár besinshi qylmys elordada jasalǵan. Bul bizdiń qala turǵyndarynyń onlaın servıster men bank qyzmetterin belsendi paıdalanýyna baılanysty. Alaıaqtar shetelden qońyraý shalyp, aýyspaly abonenttik nómirlerdi paıdalanady. Sondyqtan baılanys operatorlary arqyly tehnıkalyq tosqaýyl qoıyldy. Aýystyrylǵan nómirlerden 17 mıllıon qońyraý buǵattaldy», - dep málim etti vedomstvo basshysy.

Sonymen qatar, Marat Ahmetjanov mundaı sıpattaǵy qylmystardy ashý men tergeý tásilderiniń de ózgerip jatqanyn atap ótti.

Sonyń nátıjesinde jyl basynan beri turǵyndarǵa mıllıondaǵan shyǵyn ákelgen qylmyskerler ustalǵan.

«Tek 5 aıdyń ishinde Esil aýdanynda osyndaı 864 qylmys tirkelgen. Onyń 308-i ashyldy. Sondaı-aq, Astana men Qostanaıda jumys istemeıtin avtomashınalardy utyp alý boıynsha koll-ortalyq uıymdastyrǵan uıymdasqan qylmystyq toptyń 18 qatysýshysy ustaldy. Olar 80 azamatty aldaǵan. Kelgen shyǵyn - 90 mln teńge. Sondaı-aq, elordada alaıaq ustaldy, ol ınternet-saýda syltaýymen 26 azamatty aldap soqqan. Zalal somasy 4 mln teńgeden asady», - dep toqtaldy ІІM basshysy.