Jyl basynan beri 52 qaraǵandylyq tize býyndaryn operatsııasyz emdetti
Zamanaýı ádis deformatsııalanǵan osteoartrıt 3-4 satysynda, jasqa baılanysty ózgeristerden týyndaǵan degeneratıvti birlesken aýrýlarda qoldanylady. Ádette bul sımptomdarǵa baılanysty operatsııa jasaý qajettiligi týyndaıdy, biraq keıde patsıentter qorqynyshtan nemese qarsy kórsetilimderge baılanysty bul sheshimnen bas tartady. Dál osyndaı jaǵdaılarda dárigerler radıojıilikti júıkesizdendirý nemese ablıatsııany qoldanady. Arnaıy jabdyqtyń kómegimen birneshe pýnktsııa jasalady, ol arqyly radıojıilik tolqyndary tize býynyn qorshap turǵan júıke tamyryn buǵattaıdy.
Qaraǵandylyq Qorlan Baıtuqova eki tizesine radıojıilikti júıkesizdendirý emin aldy. Buǵan deıin ol qatty aýyrsynyp, júre almaǵan, uzaq tura almadym deıdi.
«Men býyndy aýystyrmaqshy bolyp, kezekke turdym. Maǵan medıtsınalyq saqtandyrý esebinen radıojıilikti júıkesizdendirý operatsııasyn jasaýǵa keńes berdi, sondyqtan men eshteńe tólemedim. Operatsııadan keıingi alǵashqy kúnderi jaı basyp, aqyryn júrdim. Birden fızıoemdeý ótti. Bir aptadan keıin tizemniń aýyrǵan basylyp, jaqsy boldy. Qazir esh qıyndyqsyz júre alamyn», – dedi naýqas.
Radıojıilikti júıkesizdendirý nemese ablıatsııa kúndizgi statsıonarda jáne jergilikti anestezııamen júrgiziledi. Dárigerlerdiń aıtýynsha, áser 5-7 jylǵa sozylýy múmkin. Protsedýrany keıin qaıtalaýǵa bolady.
«Býyndy aýystyrýǵa daıyn emes nemese kúrdeli operatsııaǵa qarsy kórsetilimderi bar, sondaı-aq býyndy aýystyrý kezegin kútip otyrǵan patsıentterge radıojıilikti júıkesizdendirý qolaıly. Ol pýnktsııa arqyly júzege asyrylady. Mundaı operatsııadan keıin tipti aýyrsynýdan júre almaǵandar da óz betinshe júrip ketedi», – deıdi travmatologııalyq ortalyqtyń jetekshisi professor Berik Tóleýbaev.
Ótken jyly operatsııa 65 qaraǵandylyqqa jasaldy. Bir manıpýlıatsııa úshin medıtsınalyq saqtandyrý qory medıtsınalyq uıymdarǵa 180 myń teńgeden astam qarajat jiberedi.