Jyl basynan beri 51 adam poıyz astyna túsip, mert bolǵan
QR ІІM Kóliktegi polıtsııa departamentiniń Ákimshilik polıtsııa basqarmasynyń bastyǵy Jasulan Baıkenov jyl basynan bastap poıyzdardyń shuǵyl tejeýi boıynsha 677, onyń ishinde sol aýmaqta adamnyń júrýi sebepti 270 faktiniń tirkelgenin atap ótti. Sondaı-aq temirjol boıyna tastalǵan bógde zattar boıynsha 4 fakti tirkelgen.
5 aıdyń ishinde belgilenbegen jerde temirjoldy kesip ótkeni úshin 259 adam jaýapkershilikke tartylǵan.
«Shuǵyl tejeý jolaýshylardyń densaýlyǵy men ómirine orny tolmas zalal keltirýi múmkin, sondaı-aq ol poıyzdar qozǵalysynyń qaýipsizdigine qater tóndiredi. Sonymen qatar, temirjol ústine maldyń shyǵyp ketýine qatysty jáne oǵan jol bermeý máselesi kólik polıtsııasy men men temirjol qyzmetkerleriniń alańdatýshylyǵyn týdyryp otyr», - deıdi Jasulan Baıkenov.
Onyń aıtýynsha, 5 aıdyń ishinde temirjol ústinde júrgen maldyń kesirinen mashınıster poıyzdy 349 ret shuǵyl tejeýge týra kelgen. Mysaly, «Almaty-Shý stansalary» ýchaskesinde jyl saıyn poıyz 150-160 maldy basyp ketedi. Temirjol kóliginiń astyna kóbinese sıyr, jylqy jáne qoı túsedi.
Temirjolda adamdardyń jaraqattanýy azaımaı otyr. Bıyl elimizde 51 adam poıyz astyna túsip, kóz jumǵan. Oqys oqıǵada zardap shegýge temirjoldy belgilenbegen jerden ótýi, qaýipsizdik erejelerin saqtamaýy sebepshi bolǵan.
«Kólik polıtseıleri ákimshilik sharalar arqyly osyndaı oqıǵalardyń aldyn alýǵa tyrysady. Atap aıtqanda, belgilenbegen jerlerde temirjoldy kesip ótetin júrginshiler jáne úlkenderdiń baqylaýynsyz asa qaýipti aımaqta bolǵan balalardyń ata-analary jaýapkershilikke tartylady», - dedi Jasulan Baıkenov.
Kólik polıtsııasy temirjolda qaýipsizdik erejelerin saqtaýdy, tek arnaıy belgilengen oryndarda ǵana ótý qajettigin eskertedi. Ásirese, balalarǵa temirjol oınaıtyn oryn emes ekendigin umytpaýy kerek. Temir jolǵa jaqyndaǵan kezde qulaqqapty uıaly telefondardan ajyratyp tastaý kerek. Sondaı-aq, platformanyń shetinde belgilengen syzyqta ary turýǵa bolmaıdy. Óıtkeni adam súrinip ketse, relske qulap, jaqyn kele jatqan poıyzdyń astyna túsip qalý qaýpi bar.
