Jyl basynan beri 5 myńǵa jýyq jambyldyq koronavırýs juqtyrǵan
TARAZ. QazAqparat – Bıyl Jambyl oblysynda koronavırýs ınfektsııasyn 5 myńǵa jýyq adam juqtyrǵan, dep habarlaıdy QazAqparat tilshisi.
Bul týraly Jambyl oblysynyń sanıtarııalyq-epıdemıologııalyq baqylaý departamenti basshysynyń orynbasary Saltanat Álibaeva ÓKQ aqparat alańynda ótken brıfıngte baıandady.
«Sońǵy eki aptada oblys boıynsha KVI-diń 235 jaǵdaıy tirkeldi. Onyń ishinde sımptomy bar 125 naýqas, sımptomsyz 110 naýqas bar. Shekteý sharalary álsiregen sátten bastap, ıaǵnı 17 tamyzdan búgingi kúnge deıin 2 802 reıd júrgizildi, 14317 nysan tekserýmen qamtyldy, 906 nysanda zańbuzýshylyqtar anyqtaldy. Bul rette jıi kezdesetin kemshilikter - betperde rejımin, áleýmettik qashyqtyqty, jumys tártibin saqtamaý. Buqaralyq is-sharalardy ótkizgeni úshin 490 hattama toltyrylyp, aıyppul salyndy» - dedi S. Álibaeva.
Spıkerdiń aıtýynsha, oblys boıynsha anyqtalmaǵan pnevmonııanyń 478 jaǵdaıy tirkelgen.
Barlyq naýqastar pnevmonııa dıagnozymen oblystyń medıtsına uıymdaryna júgingen kezde anyqtalypty.
«Jambyl oblysynda 24 naýryz ben 28 jeltoqsan aralyǵynda koronavırýs ınfektsııasynyń 4965 jaǵdaıy tirkeldi. Epıdemıologııalyq jaǵdaıdy baǵalaýǵa sáıkes bizdiń Jambyl oblysy jasyl aımaqta ornalasqan. Epıdemıologııalyq jaǵdaı Taraz qalasynda da, aýdandarda da turaqty»,-dedi S.Álibaeva.
