Jyl basynan beri 5,5 myńǵa jýyq sheteldik jumysshyǵa Astanada jumysqa ornalasýǵa ruqsat berilgen
ASTANA. 7 jeltoqsan. QazAparat - Astana qalasynyń Jumyspen qamtý jáne áleýmettik baǵdarlamalar basqarmasynda sheteldik jumys kúshin elordaǵa tartýǵa ruqsat berý jónindegi Komıssııanyń kezekti otyrysy ótti.
Bul týraly elordanyń resmı saıty habarlaıdy.
Komıssııa hatshysy Azamat Mahmetovtyń aıtýynsha, 2012 jyldyń basynan beri sheteldik jumysshylardy jumysqa ornalastyrýǵa 5489 ruqsat berilgen. Aıtylǵan merzimde 84 sheteldik mamanǵa ruqsat berýden bas tartyldy. 112 jumys berýshiden 627 ruqsat zańdylyqty buzǵany úshin qaıtyp alyndy nemese ony olar óz erikterimen keri tapsyrdy.
Komıssııa tóraıymy, Jumyspen qamtý jáne áleýmettik baǵdarlamalar basqarmasynyń bastyǵy Alma Altybaeva elordada sheteldik jumysshylarǵa jumysqa ornalasýǵa ruqsat berýdiń sharttary men tártibi týraly aıtyp berdi: «Zańdy tulǵa áýeli qujattar tapsyrarda sheteldik jumys kúshin qandaı maqsatta tartqysy keletinin jáne oǵan qansha maman qajet ekendigin kórsetýi qajet. Eger qujattary úkimet bekitken barlyq erejelerge sáıkes bolatyn bolsa, onda biz ruqsat beremiz».
Onyń sózine qaraǵanda, sheteldik mamannyń mindetti túrde dıplomy jáne jumys ótili bolýy qajet. «Biz shetelderden qara jumys atqaratyn jumysshylardy tartýǵa ruqsat bermeımiz. Kásibı mamandyǵy joq jumysshylar ózimizde de jetip artylady», - dep túsindirdi Komıssııa tóraıymy.
Sondaı-aq, májilis barysynda jumys berýshiniń sheteldik jumys kúshin tarta otyryp, az jalaqy qoıyp nemese sheteldikterge qaraǵanda jumys jaǵdaıyn tómendetip, qazaqstandyq jumysshylardyń quqyqtaryn shekteýge jol berilmeıtindigi aıtyldy.
Sonymen qatar sheteldik jáne otandyq jumysshylardyń paıyzdyq úlesi qatań saqtalýy qajet. Basshylyq laýazymdarda (1-2 sanat) ol tıisinshe 30%-dan 70%-ǵa deıindi quraıdy. Qarapaıym jumysshylar men 3-4 sanattaǵy mamandar úshin - 10%-nan 90%-ǵa deıindi quraıdy.
«Sonda da biz qaraımyz, eger qazaqstandyq eńbek naryǵynda talap etilip otyrǵan mamandar bolsa, onda biz ruqsat berýden bas tartamyz da, al eger ondaı mamandar shynynda da bolmasa, ruqsat beremiz», - dedi Alma Altybaeva.
Sheteldik jumysshylarǵa ruqsat berýden bas tartýdyń basqa da sebepteri bar. Máselen, elordanyń Jumyspen qamtý basqarmasyna Astana qalasynda tirkelmegen uıymdardyń qujat tapsyrýy az kezdespeıdi. «Árıne, biz olarǵa ruqsat bermeımiz. Óıtkeni, olar munda ókildikterin ashyp, ruqsat alady da sheteldik jumysshylary Atyraýda, Almatyda nemese basqa da aımaqtarda jumys isteıdi», - dep túsindirdi Basqarma bastyǵy.
