Jyl basynan beri 450 bala jol-kólik apatynan zardap shekti – QR ІІM
«Balalardyń jol-kólik oqıǵalarynda jaraqattanýyn boldyrmaý baǵytyndaǵy jumystarǵa qaramastan, el joldaryndaǵy jaǵdaı kúrdeli. Jyl basynan beri bolǵan jol apattarynda ondaǵan balanyń ómiri qıyldy jáne 450-ge jýyq kámeletke tolmaǵan bala túrli dárejede jaraqat aldy», - dedi Sh. Turlybek mınıstrliktiń baspasóz alańynda ótken brıfıng barysynda.
Ásirese baspasóz qyzmetiniń ókili sońǵy aptada balalardyń ólimine ákep soqqan jol-kólik oqıǵalary erekshe alańdaýshylyq týdyratynyn aıtty.
«9 naýryzda Jambyl oblysynda júrgizýshi mas kúıinde kólik júrgizip, Sarykemer-Túımekent avtojolynda jaıaý júrginshini qaǵyp ketti, nátıjesinde eki jasar bala qaza tapty, balanyń anasy aýrýhanaǵa jatqyzyldy. Al 10 naýryzda Nur-Sultan qalasynda Syǵanaq kóshesindegi úı aýlasynda júk kóligin júrgizýshi mektep oqýshysyn qaǵyp ketti, ol oıyn kezinde qar tóbeshikten kóliktiń astyna túsken, saldarynan 9 jasar qyz mert boldy.
Osyǵan baılanysty, esterińizge salamyz: balalardy kóshede qaraýsyz qaldyrmańyz jáne olarǵa kólik júretin jol janynda oınaýǵa ruqsat etpeńiz. Balalarǵa eshbir jaǵdaıda kenetten shyǵýǵa, júris bóligine, sonyń ishinde jaıaý júrginshiler ótkeline júgirýge bolmaıtynyn túsindirip otyryńyz», - deıdi Sh. Turlybek.
Osyndaı qaıǵyly oqıǵalardan keıin jáne mereke kúnderi qarsańynda ákimshilik polıtsııa komıteti jol qozǵalysynyń barlyq qatysýshylaryn qaýipsiz qozǵalys jyldamdyǵy men avtomobılder arasyndaǵy qashyqtyqty qatań saqtaýǵa shaqyrady.
