Jyl basynan beri 400-den astam bala tegin saýyqtyrý kýrsynan ótti

NUR-SULTAN. QazAqparat – Balalar jyly aıasynda aı saıyn 100-ge jýyq bala «Bóbek» ortalyǵynda tegin saýyqtyrý kýrsynan ótedi, dep habarlaıdy QazAqparat Bilim jáne ǵylym mınıstrligine silteme jasap.

Jyl basynan beri Almaty qalasy, Almaty, Jambyl jáne Túrkistan oblystarynan 440 bala sabaǵynan qalmaı, óz densaýlyǵyn jaqsartý múmkindigine ıe boldy. Olardyń 63,9%-ynda tynys alý organdarynyń aýrýlary jáne álsiz ımmýnıtet, 9%-ynda anemııa bar, aqýyz-energetıkalyq jetispeýshilik - 15,4%, artyq salmaq - 2,8%, lor músheleriniń aýrýlary - 7,9% jáne basqalary - 0,9%.

«Memleket basshysy balalarǵa erekshe kóńil bólý keregin atap ótip, 2022 jyldy - Balalar jyly dep jarııalady. 2021 jyldyń basynan beri QR BǴM qoldaýymen «Bóbek» ortalyǵynda jetim balalar, ekologııalyq qolaısyz aımaqtardan, kópbalaly jáne turmysy tómen otbasylardan shyqqan 1 320 bala ońaltýdan ótti»

, - deıdi QR BǴM «Bóbek» ulttyq ǵylymı-praktıkalyq, bilim berý jáne saýyqtyrý ortalyǵynyń bas dırektory Baıan Faızýllına.

Saýyqtyrý kýrsy - 22 kún. «Balalardy saýyqtyrý, ońaltý jáne olardyń demalysyn uıymdastyrý» memlekettik bıýdjettik baǵdarlamasy sheńberinde júzege asyrylady. Balalardy irikteýdi jergilikti jerlerdegi bilim berý uıymdary júrgizedi.

Saýyqtyrý kesheninde balalar densaýlyǵyn jaqsartyp qana qoımaı, sonymen birge mektep baǵdarlamasyna sáıkes oqýyn da jalǵastyrady. Oqýdan jáne emdelýden bos ýaqytta kórikti jerlerdi aralaıdy.

Budan buryn 62 myńnan astam balanyń ata-anasy sanatorıı-kýrorttyq em-domǵa memleket esebinen birge barýy múmkin dep habarlanǵan bolatyn.