Jyl basynan beri 4,5 mln astam jolaýshy ushaqpen saıahattady

NUR-SULTAN. QazAqparat - Bıylǵy 6 aıda qazaqstandyq avıakompanııalar 4,5 mıllıonnan astam jolaýshyny tasymaldady, dep habarlaıdy QazAqparat.

Alty aıdyń qorytyndysy boıynsha jolaýshylar aınalymynyń ósimi jalǵasty.

Qazaqstandyq avıakompanııalar tasymaldaǵan jolaýshylar sany 2021 jylmen salystyrǵanda 7% artyp, 4,6 mln adamdy qurady (2021 jylǵy 6 aı – 4,3 mln adam). 2020 jylǵy kórsetkishpen salystyrǵanda 119%-dy qurady (2020 jylǵy 6 aıda – 2,1 mln adam).

Aǵymdaǵy jartyjyldyqta otandyq avıakompanııalar halyqaralyq jelilerde 1,2 mln adamdy tasymaldady.

Bul 2021 jyldyń sáıkes kezeńinen 60%-ǵa artyq (2021 jylǵy 6 aıda – 0,75 mln adam), ishki jelilerde – 3,4 mln adam tasymaldandy (2021 jylǵy 6 aıda – 3,6 mln adam).

Air Astananyń jolaýshylar aǵyny shamamen 1,8 mln jolaýshyny; FlyArystan – shamamen 1,4 mln; SCAT – shamamen 1,7 mln; Qazaq Air – shamamen 238 myń jolaýshyny qurady.

Áýejaılarda qyzmet kórsetilgen jolaýshylar sany osy kezeńde 10%-ǵa artyp, 8,9 mln adamdy qurady (2021 jyldyń 6 aıynda – 8,1 mln adam).

Qazirgi ýaqytta ishki avıareısterdi 5 otandyq avıakompanııa aptasyna 687 reıs jıiligimen 57 marshrýt boıynsha oryndaıdy.

Halyqaralyq reıster 28 elge aptasyna 115 baǵyt boıynsha 518 reıs jıiligimen oryndalady (Túrkııa, BAÁ, Ózbekstan, Grýzııa, Tájikstan, Reseı, Qyrǵyzstan, Belarýs, Germanııa, Egıpet, Ońtústik Koreıa, Nıderland, Polsha, Armenııa, Ulybrıtanııa, Maldıv, Taıland, Ázirbaıjan, Katar, Kýveıt, Mońǵolııa, Úndistan, Iran, Chehııa, Gretsııa, Italııa, Qytaı jáne Saýd Arabııasy (2022 jylǵy qyrkúıekten).