Jyl basynan beri 264 myńnan astam almatylyq tegin dári-dármek aldy
ALMATY. QazAqparat - Bıylǵy jyldyń bes aıynda 264 myńnan astam almatylyq 7,3 mlrd teńgeniń dári-dármegimen qamtamasyz etildi. Bul týraly «Áleýmettik medıtsınalyq saqtandyrý qory» KEAQ Almaty qalalyq fılıaly málim etti, dep habarlaıdy QazAqparat tilshisi.
Fılıal dırektory Tileýhan Ábildaevtyń aıtýynsha, MÁMS júıesi engizilgeli beri saqtandyrylǵan almatylyqtar qymbat medıtsınalyq qyzmetterdi belsendi paıdalanady. Medıtsınalyq qyzmetterdiń paketi keńeıdi. Sonymen qatar, aýrýdyń túrleri boıynsha qajetti dári-dármekterdiń tizimi de ulǵaıdy.
«2021 jylǵa Almatyda naýqastardy ambýlatorııalyq deńgeıde dári-dármektermen jáne medıtsınalyq saqtandyrý paketimen qamtamasyz etý úshin 19 mlrd teńge kóleminde qarjy bólindi. Jyl basynan beri 264 myńnan astam almatylyq 7,3 mlrd teńgeniń dári-dármegimen qamtamasyz etildi», - dep túsindirdi fılıal dırektory.
Tegin dári-dármekterdi alý úshin patsıent dıspanserlik esepte nemese turǵylyqty jeri boıynsha mamandandyrylǵan mamanǵa tirkelýi kerek. 18 jasqa deıingi balalar dárigerdiń dıagnozymen dári-dármekter ala alady.
