Jyl basynan beri 21 tonnadan astam túrli esirtki zattary tárkilendi
ASTANA. Qarashanyń 27-si. QazAqparat /Rýslan Ǵabbasov/ - Bıyl 10 aıda quqyq qorǵaý organdary 8 myńǵa jýyq esirtki qylmysyn anyqtady. Bul týraly búgin Astanadaǵy brıfıngte QR ІІM Esirtki bıznesine qarsy kúres komıtetiniń tóraǵasy Janat Súleımenov málim etti.
«Atap aıtqanda 21 tonnadan astam túrli esirtki zattary tárkilendi, onyń ishinde 122 kg. geroın esirtkisin quraıdy»,-dedi komıtet tóraǵasy.
Onyń sózine qaraǵanda, 44 esirtki qylmysyna qatysty 8 qylmystyq toptyń joly kesildi. Sonymen qatar el aýmaǵyna esirtki alyp kelýge baılanysty 87 qylmys anyqtaldy. Taratylǵan málimetterge súıensek, esirtki paıdalanatyndar sany, ıaǵnı tizimde turǵandar 7,8 paıyzǵa azaıdy. Atap aıtqanda nashaqorlar 55,5 myńnan 50,5 myńǵa deıin azaıdy. Onyń ishinde kámeletke tolmaǵan nashaqorlardyń da úlesi tómendep otyr (3,8 myńnan 3 myńǵa deıin). Esirtkige táýeldilerdiń negizgi úlesin 15-30 jas aralyǵyndaǵylar quraıdy (26,9 myń). Ótken jylmen salystyrǵanda nashaqor jastar sany 3 paıyzǵa azaıdy.
