Jyl basynan beri 18 aqtóbelikten AITV derti anyqtaldy
AQTÓBE. QazAqparat - Jyl basynan beri 18 aqtóbelikten AITV derti anyqtaldy. Aýrý juqtyrǵandardyń ishinde erlerdiń úlesi basym ári vırýs jas jigitterden anyqtalyp jatyr, dep habarlaıdy QazAqparat tilshisi.
Aqtóbe qalasyndaǵy JITS ortalyǵynda 227 adam tur. Onyń 188-i turaqty em qabyldap, kún saıyn dárisin ishedi. Al ózgesi em alýǵa daıyndalyp jatyr.
Jyl basynan beri 18 adamnan AITV derti anyqtaldy, olardyń basym bólimi - emhana dárigerleriniń nusqaýymen qan tapsyrǵandar. Ortalyqqa baryp, arnaıy qan tapsyrǵandardyń altaýynan AITV anyqtaldy. Buryn bul dert nashaqorlar men jeńil júristi qyz-kelinshekterden anyqtalsa, qazir bilimdi, jumys istep júrgen adamdardyń úlesi artty.
«Adamdar qarapaıym saqtyq sharalaryn esten shyǵarmaýy kerek. Buryn bul dert esirtkige táýeldi, tán saýdasymen aınalysatyn adamdardan jıi anyqtalsa, qazir qarapaıym adamdardyń arasynan jıi tirkele bastady. Sebebi, adamdar vırýs juǵady dep múlde oılamaı, kezdeısoq jynystyq qatynasqa barady. Aldyn alý úshin otbasyna adal bolýy kerek. Adaldyq adamdardy emi joq vırýstan qutqara alady», - dedi Aqtóbe oblystyq JITS aldyn alý jáne oǵan qarsy kúres jónindegi ortalyǵy bas dárigeriniń orynbasary Anna Kaspırova.
Aqtóbede úsh sábıden AITV derti anyqtalǵan. Onyń ekeýi ana jatyrynda vırýs juqtyrsa, bireýi ananyń súti arqyly aýrýǵa shaldyqty.
«Vırýs juqtyrǵan adam birneshe jyl boıy óziniń aýyratynyn bilmeýi múmkin. Aqtóbe oblysynda óziniń vırýs juqtyrǵanyn 9 jyl boıy bilmegen adam da boldy. Bárin qan tapsyrý arqyly bilemiz. Sońǵy jyldary jas ári er adamdardan vırýs jıi anyqtala bastady. 20-29 jas aralyǵyndaǵy jastardyń úlesi 44 paıyzǵa jetti», - dedi ortalyqtyń bólim meńgerýshisi Aıjan Jaılaýbaeva.
Aıta keteıik, 2 jasynda AITV juqtyrǵany anyqtalyp, keıin ýaqtyly em qabyldaǵan azamat búginde 30-dan asqan. Mamandar turaqty em qabyldaǵan adamnyń uzaq jasaıtynyna senimdi.
