Jyl basynan beri 18 adam bızneske reıderlik jasaǵany úshin jaýapqa tartylǵan
«Statıstıka kórsetkendeı, ombýdsmen ınstıtýtynyń jumys istegen jyldary bizge 33 myńnan astam shaǵym kelip túsken. Eń alǵashqy 2016 jyly 7200 shaǵym tússe, 2021 jyldyń qorytyndysy boıynsha 4182 shaǵymǵa deıin tómendeý baıqaldy. Al bıylǵy 11 aıdyń qorytyndysy boıynsha meniń keńseme 3920 shaǵym tústi. Kásipkerler negizinen jer máselelerine, aýyl sharýashylyǵy, salyq jáne quqyq qorǵaý organdaryna shaǵymdanady», - dedi Rýstam Júrsinov Jibek Joly telearnasyndaǵy suhbatynda.
Spıkerdiń aıtýynsha, sońǵy ýaqytta kóptegen shaǵymdar quqyq qorǵaý organdary boıynsha kelip jatyr.
«Ózderińizge belgili, ótken jyly zańǵa qol qoıylyp, reıderlik jaýapkershilik kúsheıtildi jáne Qylmystyq kodekstiń 365-baby «Zańdy kásipkerlik qyzmetpen aınalysýǵa kedergi jasaý» dep atalady. Statıstıkaǵa júginsek, aldyńǵy 4 jylda bul baptar boıynsha nóldik statıstıka bolǵan, ıaǵnı eshkim jaýapqa tartylmaǵan. Bas prokýratýranyń málimetinshe, bıylǵy 11 aıda reıderlik baby boıynsha 18 adam jaýapqa tartylǵan», - dedi R. Júrsinov.
Sonymen birge, ýákil Prezıdent tapsyrmasymen el óńirlerin aralap, 17 aımaqtaǵy kásipkerlermen kezdesken.
«Jaǵdaı birqalypty, aıtarlyqtaı dabyl qaǵatyn eshteńe joq. Óńirlerde shamamen 20-25 adam qabyldaýǵa jazylady. Ár aımaqtyń óz ereksheligi bar, degenmen kópshiligin jer máselesi óte qatty alańdatyp otyr. Qala qurylysy, sýbsıdııalaý máseleleri de ózekti», - deıdi R. Júrsinov.
Aıta keteıik, QR Prezıdenti Qasym-Jomart Toqaev saltanatty ulyqtaý rásiminde shaǵyn jáne orta bıznestiń damýyna zańsyz kedergi keltiretinderdi zańǵa sáıkes qatań jaýapqa tartýdy tapsyrǵan edi.
