Jyl basynan beri 17 myńǵa jýyq adam karantın buzǵany úshin aıyppul tólegen
Sanıtarııalyq-epıdemıologııalyq baqylaý komıtetiniń málimetinshe, Ashyq júıesi boıynsha anyqtalǵan «qyzyl» mártebesi bar 165 adam ózin-ózi oqshaýlaý rejımin buzǵany úshin ákimshilik jaýapkershilikke tartylady.
Respýblıkada karantın shekteýleriniń saqtalýyn baqylaıtyn monıtorıng toptarynyń jumysy jalǵasýda.
Búgingi tańda Qazaqstannyń barlyq óńirlerinde 1,8 myńnan astam monıtorıng toby jumys isteıdi.
Bıylǵy qańtar men 13 maýsym aralyǵynda el óńirlerinde 103 762 reıd júrgizilip, 630 757 nysan tekserildi.
Júrgizilgen jumys barysynda mobıldi toptar nysandarda karantındi buzýdyń 17 043 oqıǵasyn anyqtady.
13 maýsymdaǵy jaǵdaıǵa sáıkes shekteý sharalaryn, onyń ishinde karantındi buzǵany úshin 16 712 adam jaýapkershilikke tartyldy.
Bul rette 9 670 kásipkerge qatysty jazalaý sharalary qoldanyldy.
Óndirilgen aıyppuldyń jalpy somasy 1 352,2 mlrd teńgeden asady. Sotqa 310 materıal jiberildi.
Munymen qosa, 10 maýsymnan bastap Ashyq jobasyna qatysatyn nysandarda «qyzyl» mártebesi bar 165 jáne «sary» mártebesi bar 168 adam tirkelgen.
Sanıtarııalyq-epıdemıologııalyq qyzmet organdary oqshaýlaý rejımin buzǵan «qyzyl» mártebesi bar azamattarǵa qatysty ákimshilik quqyq buzýshylyq týraly isterdi qozǵaý boıynsha jumysty bastady.
Eske salaıyq, ótken aptada KVI-ǵa shaldyqqan naýqastar jáne olarmen baılanysta bolǵan adamdar úshin oqshaýlaýdyń mindetti rejımin kózdeıtin sanıtarııalyq-epıdemıologııalyq talaptar kúshine engen bolatyn.
Belgilengen talaptardy oryndamaǵany úshin oqshaýlaý rejımin buzýshylarǵa 30 AEK nemese 87 510 teńge mólsherinde aıyppul salynady (QR ÁQBtK 452-baby).
