Jyl basynan beri 11 myń bosqyn Jerorta teńizi arqyly Eýropaǵa jetken
ASTANA. QazAqparat - 2017 jyldyń basynan beri Jerorta teńizi arqyly 11 myńnan astam bosqyndar Eýropaǵa jetken, dep habarlady RIA Novostı Halyqaralyq kóshi-qon ortalyǵyna silteme jasap.
Buǵan deıin kóshi-qon ortalyǵy 2016 jyly Jerorta teńizi arqyly Eýropaǵa ótkisi kelgen 5 myń mıgranttyń qaza tapqanyn, 363 myń adamnyń Eýropa elderine jetkenin habarlaǵan edi.
Sońǵy derekter boıynsha, bıylǵy 5 aqpanǵa deıin 11010 bosqyndar men mıgranttar Eýropaǵa ótken, onyń 85% - Italııaǵa, qalǵany - Grekııada qalǵan. Ótken jyly dál osyndaı kezeńde Eýropaǵa 74808 adam ótken edi.
Uıym 255 mıgranttyń jolda qaza tapqanyn jáne olardyń túrli baǵytqa bet alǵanyn anyqtady.
Juma kúni Maltada ótken EO memleket basshylarynyń sammıti Ortalyq-Jerorta joldary arqyly mıgranttardyń EO-ǵa zańsyz kelýin toqtatý úshin Lıvııaǵa kómek berý týraly sheshim qabyldady. Bul baǵyt boıynsha 2016 jyly Eýroodaqqa 181 myńnan astam adam kelgen. Al teńizde qaza tapqan jáne joǵalǵandar sany 2013 jyldyń rekordyn buzdy. 2017 jyldyń alǵashqy eki aıynda da 200-den astam adam mert bolyp úlgerdi, delingen qujatta. Qazir Lıvııa Ortalyq-Jerorta teńizi arqyly mıgranttar ótetin negizgi el bolyp otyr.
