Jyl basynan beri 1 myńnan astam adam mal urlyǵymen ustaldy
NUR-SULTAN. QazAqparat – Bul týraly Krımınaldyq polıtsııa departamentiniń bastyǵy, polıtsııa polkovnıgi Dýman Taev aıtyp berdi, dep habarlaıdy QazAqparat tilshisi.
«Toptasyp mal urlaıtyndarmen kúresý úshin óńirlerde jedel-izdestirý toptary jumys isteıdi, olar mal bazarlary, mal soıý oryndary men saýda núktelerin tekseredi. Jyl basynan beri myńnan astam adam (1024) mal urlyǵymen ustalǵan, onyń ishinde 145 adam toptasyp jumys istegen. Máselen, Túrkistan oblysy PD qyzmetkerleri úsh adamdyq qylmystyq topty anyqtady, olardyń Kentaý aýdanynda 19 mal urlyǵyn jasaǵany dáleldendi», - dedi D. Taev mınıstrdik uıymdastyrǵan onlaın brıfıngte.
Dál osyndaı jaǵdaı Batys Qazaqstan oblysynda da tirkelgen.
«Batys Qazaqstan oblysynda bıylǵy sáýir aıynda 52 urlyq jasap, 170-ten astam mal urlaǵan top ustalǵan. Jalpy, sońǵy 5 jylda mal urlyǵy 42%-ǵa tómendegen. 2015 jyly 8 myńnan astam qylmys tirkelse, 2019 jyly 4,5 myń qylmys anyqtaldy. Qoldy bolǵan mal sany da 38% – 25 myńnan 16 myńǵa deıin azaıdy. Bıylǵy 10 aıda mal urlyǵy 41%-ǵa (3 789-dan 2 248-ge deıin azaıǵan. Pandemııaǵa baılanysty karantın sharalaryn engizý de buǵan aıtarlyqtaı áser etti», - dep túıindedi D.Taev.
Aıta keteıik, ótken aptada Qazaqstanda 251 mal urlyǵy anyqtalyp, 229 adam ustaldy.
Bıyl Qylmystyq kodekske 188-1 «Mal urlyǵy» baby engizildi, onda 12 jylǵa deıin bas bostandyǵynan aıyrý jáne múlkin tárkileý túrindegi eń joǵarǵy jaza kózdelgen.
