Jyl basynan beri 1,8 myńnan astam etnıkalyq qazaq qandas mártebesin aldy
NUR-SULTAN. QazAqparat – Bıylǵy jyldyń 1 naýryzyndaǵy jaǵdaı boıynsha 1 863 etnıkalyq qazaq tarıhı otanymen tabysyp, qandas mártebesin aldy, dep habarlaıdy QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.
Jalpy 1991 jyldan beri respýblıkaǵa 1 mıllıon 89,7 myń etnıkalyq qazaq oraldy.
Jyl basynan Qazaqstanǵa kelgen qandastardyń jartysynan kóbi (68,2%) Ózbekstannan, 14% – Qytaıdan, 6,3% – Túrikmenstannan, 2,3% – Mońǵolııadan jáne 9,5% basqa elderden.
Kelgen etnıkalyq qazaqtar negizinen Almaty (31,6%), Mańǵystaý (14,8%), Túrkistan (12,4%) jáne Jambyl (6,3%) oblystaryna, sondaı-aq Almaty (7,1%), Nýr-Sýltan (6,3%) jáne Shymkent (7,9%) qalalaryna qonystandy.
Aǵymdaǵy jylǵy 1 naýryzdaǵy jaǵdaı boıynsha eńbekke qabiletti jastaǵy etnıkalyq qonys aýdarýshylar sany 62,3%-dy, eńbekke qabiletti jastan kishi 22,7%-dy jáne zeınetkerler 15%-dy quraıdy.
Eńbekke qabiletti jastaǵy qandastardyń ishinen bilim deńeıi boıynsha 11%-y joǵary bilimdi, 38,9%-y orta kásibı bilimdi, 48,5%-y jalpy orta bilimdi jáne 1,5%-ynyń bilimi joq.
