Jyl basynan beri 1,5 myńnan astam páter tonaýshy ustaldy

ASTANA. QazAqparat – Qazaqstanda sońǵy 5 jylda páter tonaý qylmysy azaıyp keledi. Bul týraly QR ІІM Krımınaldy polıtsııa departamentiniń asa mańyzdy ister jónindegi aǵa jedel ýákili Áset Júkenov aıtyp berdi, dep habarlaıdy QazAqparat.

«Uıymdastyrý sharalary men maqsatty jumys nátıjesinde jyl basynan beri 1,5 myńnan astam páter urysy ustaldy. Onyń ishinde 100-ge jýyq «gastroler» urylar, ıaǵnı túrli qalalarda urlyq jasaıtyndar jáne 175 qylmystyq top ustaldy», - dedi Áset Júkenov QR ІІM aptalyq brıfınginde.

Máselen, jyl basynda Almatyda Shyǵys Qazaqstan oblysynyń 3 turǵyny, ıaǵnı gastroler-páter urylary ustaldy. Olar plastıkalyq terezeler arqyly úılerge kirip, 5 ret urlyq jasaǵan. Jalpy, keltirilgen zalal 9 mln teńgeden asty, olardyń barlyǵy 3 jylǵa bas bostandyǵynan aıyryldy.

Bıylǵy jaz maýsymynda jedel-izdestirý is-sharalary arqyly Aqmola oblysynyń Şýchınsk qalasynyń buryn sottalǵan turǵyny ustaldy. Ol osy qalada turǵyndardyń joqtyǵyn paıdalanyp, úsh páterdi tonaǵan. Zalal 3 mln teńge boldy.

Jalpy, qabyldanǵan sharalar nátıjesinde sońǵy 5 jylda páter urlyǵy jyl saıyn orta eseppen 34,4%-ǵa tómendedi. 2018 jyly 34 myńnan astam qylmys tirkelse, 2022 jyly 11 myńnan aspaǵan. Bıyl da 16,1% nemese 1 100 qylmysqa tómendeý baıqalady.

«Biraq, jeke múlikti urlaǵan adamdar páterge kirý daǵdylary men tásilderin únemi jetildirip otyratynyn atap ótken jón. Olar zamanaýı tehnıkany, uıaly baılanysty paıdalanady, esikter men qulyptardy ashýǵa arnaıy beıimdelgen quraldardy satyp alady jáne jasaıdy. Bul rette, negizinen páter urlyǵy kúndizgi ýaqytta, atap aıtqanda barlyǵy jumysta nemese oqýda bolǵan kezeńde jasalady», - dedi spıker.

Aıta keteıik, eldegi barlyq urlyq túrleriniń tórtten bir bóligi páter tonaý bolyp otyr.