Jyl basynan beri 1,5 mln qazaqstandyq tegin dári-dármekpen qamtyldy - DSM
Mınıstrdiń aıtýynsha, jyl sońyna deıin 3,5 mln naýqas tegin dári-dármekpen qamtamasyz etilýi kerek.
«Ótken jyldan bastap, búkil tegin dári-dármekti satyp alý protsesi ortalyqtandyryldy. Qazir barlyq dáriler SK-Farmatsııa kompanııasy arqyly satyp alynady. Birneshe tehnıkalyq máseleler sheship, konkýrstardy onlaın ashyq túrde ótkizdik. Sol ashyqtyq negizinde kóp baǵalar tómen tústi. Nátıjesinde, 26 mln teńge únemdedik. Bul qarajat qosymsha dári alýǵa jumsaldy jáne qosymsha 20 myńnan astam naýqasqa tegin dári-dármek berildi», - dedi Birtanov Ortalyq kommýnıkatsııalar qyzmetinde ótken baspasóz máslıhatynda.
Densaýlyq saqtaý mınıstrligi tegin dári-dármektiń halyqqa jetkizilmeýiniń birqatar sebepterin anyqtaǵan.
«Densaýlyq saqtaý basqarmalary men emhanalar dári-dármek kólemin durys josparlaı almady. Naýqastardyń azaıýy nemese kóbeıýi faktoryn eskermegen. Dárilik zattardyń taýarlyq ataýynyń ózgerýi, turaqty túrde qaıta tirkeýden ótetini de nazarǵa alynbaǵan. Osyǵan baılanysty, óńirler dárilerge durys tapsyrys bermegen», - dep túsindirdi mınıstr.
Qazirgi ýaqytta barlyq emhanalar elektrondy jumys formatyna aýysyp jatyr jáne mınıstrlik naýqastardyń naqty sany men qajetti dárilerin onlaın baqylaýǵa aldy.
«Eń bastysy tsıfrlandyrý dáriniń jetispeýshiligi men sybaılas jemqorlyqtan arylýǵa múmkindik beredi. Jyl basynda tegin beriletin dárilerdiń satylymǵa shyǵyp ketkenin anyqtap edik. Qazir bul oqıǵany quqyq qorǵaý organdary tekserip jatyr. Tegin dárilerdiń dárihanalarda satylmaýy úshin turaqty baqylaý kerek. Baqylaýǵa turǵyndar da úles qosa alady», - dedi Eljan Birtanov.
Aıta keteıik, kelesi jyly naýqastar tegin dári-dármekti alǵanyn SMS pen mobıldi qosymsha arqyly rastaı alady.